BUU 2026 jylǵy qysqy Olımpıadanyń bitimgerlik týraly qararyn qabyldady

ASTANA. KAZINFORM — BUU Bas Assambleıasy (BA) Mılan men Kortına-d’Ampetstso qalalarynda 2026 jyly ótetin qysqy Olımpıada kezinde olımpııalyq bitimgerlikti saqtaý jónindegi rezolıýtsııany qabyldady, dep habarlaıdy TASS.

«Sport arqyly Jer betindegi beıbitshilikti nyǵaıtý jáne adamdardyń baqytty ómirin qurý jáne olımpııalyq ıdealdardy iske asyrý» dep atalatyn qarar jobasy konsensýspen qabyldandy.

— Biz sport pen saıasatty bólip qarastyrý úshin ıyq tirestire jumys isteýimiz kerek. Bul sportshylardyń qabyldaýshy elderge kelip, jarystarǵa qatysýǵa múmkindigi bolýy tıis degendi bildiredi. Olar saıası sebeptermen vıza berilmeı qalý qaýpine tap bolmaýy kerek, — dedi daýys bererdiń aldynda Halyqaralyq olımpııalyq komıtettiń (HOK) prezıdenti Kırstı Koventrı.

Qujat toǵyz tarmaqtan turady, olardyń birinshisi — Olımpıada bastalardan jeti kún buryn bastalyp, Paralımpıada jabylǵannan keıin jeti kún ótkenge deıin jalǵasatyn kezeńde olımpııalyq bitimgerlikti saqtaýǵa shaqyrý, sondaı-aq sportshylarǵa, resmı tulǵalarǵa jáne akkredıtatsııalanǵan barlyq adamdarǵa qaýipsiz jolda júrýdi, qatysýdy jáne qoljetimdilikti qamtamasyz etý.

Budan bólek, rezolıýtsııa «barlyq múshe memleketterdi Olımpıada jáne Paralımpıada oıyndary kezinde jáne olar aıaqtalǵannan keıin, sportty beıbitshilikke, dıalogqa, tózimdilikke jáne tatýlasýǵa yqpal etetin qural retinde paıdalaný jónindegi kúsh-jigerinde Halyqaralyq olımpııalyq komıtet jáne Halyqaralyq paralımpııalyq komıtetpen yntymaqtasýǵa» shaqyrady.

Materıalda atap ótilgendeı, Olımpıada oıyndary 2026 jyldyń 6–22 aqpany aralyǵynda Mılan men Kortına-d’Ampetstsoda ótedi.

Aıta keteıik, buǵan deıin Halyqaralyq olımpııalyq komıtettiń (HOK) Olımpıada oıyndarynda transgender sportshylardyń áıelder jarystaryna qatysýyna tyıym salatyny habarlanǵan.