BUU 2026 jylǵy bıýdjetin $500 mln-ǵa qysqartýdy josparlap otyr
ASTANA. KAZINFORM — Birikken Ulttar Uıymy (BUU) 2026 jylǵa arnalǵan bıýdjetin qaıta qarap, shyǵyndardy 500 mıllıon dollardan astam somaǵa qysqartýdy usyndy. Bul týraly BUU Bas hatshysynyń «BUU-80» bastamasy aıasynda habarlandy.
Uıymnyń málimetinshe, qaıta qaralǵan baǵalaýlar BUU-nyń ákimshilik jáne bıýdjettik máseleler jónindegi Konsýltatıvtik komıtetine usynylǵan. Josparǵa sáıkes, shyǵyndar 2025 jylǵy bıýdjetpen salystyrǵanda 15,1 paıyzǵa, al shtattyq laýazymdar sany 18,8 paıyzǵa qysqarady. Qysqartýlardyń bir bóligi bitimgershilik operatsııalaryn qoldaý bıýdjetine de áser etedi.
Komıtet usynystardy qarap, óz qorytyndysyn BUU Bas Assambleıasynyń ákimshilik jáne bıýdjettik máselelerdi qaraıtyn Besinshi komıtetine joldaıdy. Bul komıtette sheshimderge barlyq 193 múshe memleket qatysady.
BUU Bas hatshysy Antonıý Gýterrısh múshe memleketterge joldaǵan hatynda qysqartýlar resýrstardy bólýdiń jan-jaqty taldaýynan keıin jasalǵanyn atap ótti. Onyń aıtýynsha, sharalar BUU Jarǵysynyń úsh negizgi baǵyty — beıbitshilik pen qaýipsizdikti qoldaý, adam quqyqtaryn qorǵaý jáne turaqty damýdy qamtamasyz etý arasynda teńgerimdi saqtaýǵa baǵyttalǵan.
— Qysqartýlar muqııat eseptelip, nysanaly túrde júrgizilýde. Olar jappaı emes, naqty baǵyttarǵa ǵana qatysty, — dedi Gýterrısh.
Uıymnyń habarlaýynsha, eń osal elderdi qoldaýǵa baǵyttalǵan baǵdarlamalarǵa ózgeris engizilmeıdi. Olardyń qatarynda teńizge shyǵa almaıtyn, shaǵyn araldyq jáne az damyǵan memleketter bar. Afrıka qurlyǵyn damytýǵa arnalǵan bastamalar, Beıbitshilikti nyǵaıtý qory jáne turaqty ókilder júıesi de burynǵy deńgeıde qoldaýdy jalǵastyrady.
Bıýdjetti qaıta qaraý barysynda BUU Hatshylyǵynyń reformasyna qatysty alǵashqy usynystar da engizilgen. Atap aıtqanda, Nıý-Iork pen Bangkokta jańa ákimshilik ortalyqtar qurý, jalaqy esepteý fýnktsııasyn biryńǵaı ǵalamdyq topqa biriktirý, sondaı-aq Jeneva men Nıý-Iork sııaqty qymbat lokatsııalardaǵy keıbir qyzmetterdi arzanyraq óńirlerge kóshirý kózdelgen.
Buǵan deıin Bas hatshy Antonıý Gýterrısh BUU Qaýipsizdik keńesin reformalaý qajettigin málimdegen bolatyn.