BUU 2026 jyldy Qazaqstannyń bastamasymen halyqaralyq eriktiler jyly dep jarııalady
Qazaqstannyń bastamasymen Birikken Ulttar Uıymynyń Bas Assambleıasy 2026 jyldy Ornyqty damý maqsatynda halyqaralyq eriktiler jyly dep jarııalaǵan qarardy qabyldady.
Bul týraly Kazinform QR Syrtqy ister mınıstrliginiń baspasóz qyzmetine silteme jasap habarlaıdy.
Halyqaralyq eriktiler jylyn jarııalaý týraly bastamany Qazaqstan Respýblıkasynyń Prezıdenti Qasym-Jomart Toqaev BUU minberinen 2020 jyly Bas Assambleıanyń 75-sessııasynyń jalpy saıası pikirtalastary barysynda kóterdi.
Qazaqstan bul qarardy álemniń barlyq aımaqtarynan pikirles elderimen – Armenııa, Bolıvııa, Germanııa, Kenııa jáne Kırıbatı araldyq memleketimen birlesip usyndy. Bul qujattyń teń avtorlyǵyna BUU-ǵa múshe 54 memleket qosyldy.
Halyqaralyq jyl aıasyndaǵy is-sharalar volonterlik qozǵalysqa ulttyq, aımaqtyq jáne jahandyq deńgeıde qýatty serpin beredi, eriktiler qyzmeti salasyndaǵy halyqaralyq yntymaqtastyqty nyǵaıtýǵa jáne ony odan ári damytýdyń negizgi vektorlaryn aıqyndaýǵa úles qosatyn bolady.
Prezıdent Qasym-Jomart Toqaev elimizde volonterlik qyzmetti damytýǵa erekshe mán berip, ony Ádiletti Qazaqstandy qurýdyń mańyzdy quramdas bólikteriniń biri dep sanaıtynyn atap ótý qajet.
Memleket basshysynyń pikirinshe, eriktiler – óz eliniń shynaıy patrıottary – adamgershilik qundylyqtardy bárinen joǵary qoıyp, memleket pen qoǵam arasynda senimdi seriktestikti nyǵaıtýda erekshe ról atqarady. Janqııarlyq pen meıirimdilik qazaq halqyna tán qasıet ekenin atap ótken QR Prezıdenti bul qasıetterdi jas urpaq boıyna sińirýdiń mańyzdylyǵyn birneshe ret basa aıtty.
Memleket basshysynyń bastamasymen 2020 jyl Qazaqstanda Eriktiler jyly bolyp jarııalanyp, 2021-2023 jyldarǵa arnalǵan volonterlik qyzmetti damytýdyń jol kartasy qabyldandy. Qolǵa alynǵan sharalardyń nátıjesinde elimizdegi eriktiler sany 200 myń adamǵa jetti. Qazaqstandyq jastar álemniń ártúrli elderinde BUU eriktileri retinde qyzmet isteıdi.
2023 jylǵy 20-21 shildede Astanada Memleket basshysynyń, BUU-nyń joǵary laýazymdy ókilderiniń jáne álemniń 30-dan astam elinen kelgen volonterlerdiń qatysýymen Halyqaralyq volonterler forýmynyń uıymdastyrylýy elimizdiń jahandyq eriktiler qozǵalysyndaǵy mańyzdy rólin taǵy da rastady.
