BUU: 2024 jyly Iranda 900-den astam adam ólim jazasyna kesildi
ASTANA. KAZINFORM – 2024 jyly Iran 901 adamdy, onyń ishinde jeltoqsan aıynda 40-qa jýyq adamdy bir aptanyń ishinde ólim jazasyna kesti, dep jazady DW.
Bul týraly seısenbi, 7 qańtarda Birikken Ulttar Uıymynyń Adam quqyqtary jónindegi Joǵarǵy Komıssarynyń keńsesi málimdegen.
Kóp jaǵdaıda eń joǵary jaza esirtkige qatysty qylmystar úshin taǵaıyndalǵan, sonymen qatar dıssıdentter men 2022 jylǵy narazylyq aktsııasyna qatysqandar da ólim jazasyna kesilgen. Sonymen qatar, ólim jazasyna kesilgen áıelderdiń sany artty, delingen málimdeme.
2023 jyly Iranda 853 adam ólim jazasyna kesilgen bolatyn.
Birikken Ulttar Uıymynyń Adam quqyqtary jónindegi Joǵarǵy komıssary Folker Túrik bolyp jatqan oqıǵalarǵa alańdaýshylyq bildirdi.
– Iranda ólim jazasyna kesilgen adamdar sanynyń jyl ótken saıyn kóbeıip bara jatqany qatty alańdatady, Irannyń bul únemi artyp kele jatqan «ólim jazasyna kesý» aǵynyn toqtatýdyń ýaqyty keldi, - dedi ol.
Folker Túrik Tegerandy jazany túpkilikti joıý maqsatynda oǵan moratorıı engizýge shaqyrdy. Tyıym salý nemese moratorıı álemniń 170-ke jýyq elinde engizilgen.
Qosa keteıik, Italııa Iran elshisin SІM-ne shaqyryp, ustalǵan jýrnalıstiń bosatylýyn talap etken bolatyn.
Sondaı-aq Iran prezıdenti hıdjab týraly zańǵa veto qoıdy.