BUU: 200 myńnan astam adam Lıvannan qashyp, Sırııada bas saýǵalady
ASTANA. KAZINFORM — Taıaý Shyǵystaǵy soǵys aıasynda naýryz aıynyń basynan beri Lıvannan Sırııa Arab Respýblıkasyna 200 myńnan astam adam ótken. Bul týraly BUU-nyń Bosqyndar isi jónindegi Joǵarǵy komıssary basqarmasynyń (BUU BJKB) Sırııadaǵy ýaqytsha ókili Asır ál-Madaıen Jenevadaǵy aptalyq brıfıngte málimdedi. Bul týraly Anadoly agenttigi jazdy.
Onyń aıtýynsha, 2–27 naýryz aralyǵynda Sırııa bıliginiń derekterine sáıkes, 200 myńnan astam adam (onyń ishinde shamamen 180 myńy sırııalyqtar) úsh resmı shekara beketi arqyly elge oralǵan. Bul aǵynnyń ishinde qaıtadan qaýipten qashqan bosqyndar da, otanyna oralǵysy kelgender de bar.
Sonymen qatar, 28 myńnan astam lıvandyq Izraıldiń qarqyndy áýe shabýyldarynan qutylý úshin Sırııaǵa ótken. Kóptegen adamdar shekaraǵa qatty sharshaǵan jáne kúızeliske ushyraǵan kúıde jetip jatyr.
Izraıldiń Lıvanǵa shabýyldary
Izraıl armııasynyń 2 naýryzdaǵy málimdemesine sáıkes, eldiń soltústigine Lıvan aýmaǵynan zymyran atylǵany anyqtalǵannan keıin dabyl sırenalary qosylǵan.
Keıin Izraıl Lıvan aýmaǵyna, sonyń ishinde astana Beırýtqa áýe soqqylaryn bastaǵanyn habarlap, qurlyqtaǵy operatsııany keńeıtý týraly sheshim qabyldady. Áskerı áreketter áýe jáne teńiz soqqylarymen qatar júrgizilgen.
Lıvan Densaýlyq saqtaý mınıstrliginiń sońǵy málimetinshe, 2 naýryzdan beri Izraıl shabýyldarynyń saldarynan 1247 adam qaza tapqan.
Al Lıvan úkimeti janyndaǵy tótenshe jaǵdaılar qyzmetiniń habarlaýynsha, shabýyldar men okkýpatsııa saldarynan el ishindegi májbúrli qonys aýdarǵandar sany 1 mıllıon 162 myń adamnan asqan.
Buǵan deıin Lıvannyń ońtústiginde ındonezııalyq BUU beıbitshilik mıssııasynyń áskeri qaza tapqanyn jazdyq.
