Býtan ıtten juǵatyn qutyrý aýrýyn joıdy
ASTANA. KAZINFORM – Dúnıejúzilik densaýlyq saqtaý uıymy Býtanda ıtterden adamdarǵa qutyrý aýrýynyń berilýin qoǵamdyq densaýlyq saqtaý máselesi retinde joıylǵanyn rastady. Osylaısha, Býtan DDU-nyń Ońtústik-Shyǵys Azııa óńirinde mundaı nátıjege qol jetkizgen alǵashqy el atandy, dep habarlaıdy DDU.
DDU málimetinshe, 2023 jylǵy maýsymnan beri Býtanda ıtten juqqan qutyrýdan adam ólimi tirkelmegen.
Uıymnyń atap ótýinshe, bul jetistik densaýlyq saqtaý, veterınarııa jáne qorshaǵan ortany qorǵaý salalary mamandarynyń birlesken jumysyn kózdeıtin «Birtutas densaýlyq» tásili aıasyndaǵy on jyldan astam ýaqytqa sozylǵan jumystyń nátıjesi.
Býtanda ıtterge jappaı vaktsınatsııa júrgizilip, olardyń sanyn retteý sharalary qolǵa alynǵan. Sonymen qatar epıdemıologııalyq baqylaý kúsheıtilip, halyq arasynda túsindirý jumystary júrgizilgen. Kúdikti jaǵdaı anyqtalǵan kezde densaýlyq saqtaý jáne veterınarııa qyzmetteriniń mamandary yqtımal baılanystardy birlesip anyqtap, qajet bolǵan jaǵdaıda oqıǵa ornyna baryp tekserý júrgizedi.
DDU-nyń bul sheshimi eki kezeńdi baǵalaýdan keıin qabyldandy. 2026 jylǵy tamyzda halyqaralyq sarapshylar toby Býtandaǵy medıtsınalyq mekemeler men zerthanalarǵa baryp, qutyrýǵa qarsy kúres baǵdarlamasynyń derekterin zerttedi. Sondaı-aq Úndistanmen shekaralas aımaqtaǵy epıdemıologııalyq jaǵdaı baǵalandy.
Býtanda qutyrýdyń aldyn alý sharalary jalǵasa beredi. Atap aıtqanda, eldiń barlyq 20 aýdanynda tistelgennen keıingi profılaktıka tegin júrgiziledi, ıtterge jappaı vaktsınatsııa jalǵasady jáne adamdar men janýarlar arasyndaǵy aýrýlarǵa birlesken epıdemıologııalyq baqylaý saqtalady.
DDU talaptaryna sáıkes, ıtterden adamǵa qutyrýdyń berilýin joıý mártebesin rastaý úshin elde keminde eki jyl boıy osy aýrýdan adam ólimi tirkelmeýi jáne aýrýdyń qaıta taralýyna jol bermeýge múmkindik beretin tıimdi júıe saqtalýy qajet.
Qutyrý klınıkalyq belgileri paıda bolǵannan keıin derlik árdaıym ólimge ákeledi. Alaıda janýarlardy vaktsınatsııalaý jáne ıt nemese basqa janýar tistegennen keıin ýaqtyly profılaktıkalyq sharalar júrgizý arqyly aýrýdyń aldyn alýǵa bolady.
DDU málimetinshe, álemde adamdarǵa qutyrýdyń berilý jaǵdaılarynyń 99 paıyzyna deıin aýrý juqtyrǵan ıtterdiń tisteýi nemese tyrnaýy saldarynan bolady.
