Býtakovka shatqalynda 5 aǵash kesken azamat, endi ornyna 100-in otyrǵyzatyn boldy
ALMATY. QazAqparat - Almatyda Býtakovka shatqalynda aǵashtardy zańyz kesken azamat anyqtaldy, dep habarlaıdy QazAqparat tilshisi.
Almaty qalalyq Jasyl ekonomıka basqarmasynyń málimetinshe, basqarmaǵa áleýmettik jeliler arqyly Býtakovkada aǵashtardyń kesilip jatqandyǵy týraly aqparat kelip tústi.
Basqarma mamandary atalǵan jerge baryp, S.Dolmatov esimdi azamattyń jer telimin josparlaý jumystaryn júrgizý kezinde 5 aǵashty kesip tastaǵanyn anyqtady.
«Osyǵan oraı quqyq buzýshyǵa qatysty ákimshilik hattama toltyrylyp, jıyrma ese kóp aǵash otyrǵyzý týraly kepilhat alyndy»,- dep habarlady basqarmadan.
Sonymen qatar, Іle -Alataýy memlekettik ulttyq tabıǵı parkiniń aqparatyna sáıkes, erekshe qorǵalatyn jasyl jelek qoryn retteý tártibi atalǵan Erejede qarastyrylmaǵan.
Bul jerde jumystar Orman kodeksi men orman qoryn kesý erejelerine sáıkes júrgiziledi.
