Burynnan qoldanylyp kele jatqan antıbıotıkterge mıkrobtardyń tózimdiligi artqan - J.Aqanov
ALMATY. 7 sáýir. QazAqparat /Ádilet Musahaev/ - Almaty qalalyq salaýatty ómir saltyn qalyptastyrý ortalyǵynda «Densaýlyq saqtaý» kúnine oraı medıtsına mamandary arasynda «Mıkrobtarǵa qarsy dári-dármektiń ornyqtylyǵy jáne onyń jahandyq taralýy» atty semınar ótip jatyr.
Atalǵan ortalyqtyń nasıhat jáne kommýnaldyq isi bóliminiń bastyǵy Jaqsygeldi Aqanov salaýatty ómir saltyn qalyptastyrý tóńiregindegi is-sharalardyń barlyǵy osy ortalyq boıynsha júrgiziletindigin aıtady. "Halyqaralyq densaýlyq saqtaý kúnine arnalyp otyrǵan búgingi sharanyń maqsaty - halqymyz salaýatty, salamatty bolsyn degen nıette ótkizilip otyr", -deıdi ol.
Júrek dertimen jáne basqa da aýrý túrlerin emdeýmen aınalysatyn ınstıtýttyń ǵylymı mamandary qatysyp jatqan shara barysynda qazirgi kúngi dári-dármektiń kúshi jáne ony qoldaný jaǵdaıy keńinen talqylanýda.
"Burynnan qoldanylyp kele jatqan antıbıotıkterge mıkrobtardyń tózimdiligi artqan. Sondyqtan qazirgi ýaqytta ǵylymı jáne ózimizdiń dárigerlik kóz-qarasymyzben qaraǵanda jańa, kúshi myqty dári-dármek qajet bolyp tur. Naýqasqa naqty dıagnoz qoıyp, durys em nusqasa olar jyldam saýyǵady", -deıdi J.Aqanov.
Sonymen qatar ol adamdardyń dári-dármekti jónsiz qoldanbaýyn, tek dárigerdiń nusqaýymen ǵana paıdalanǵany jón ekendigin aıtady. Óıtkeni ol birinshiden kepildeme bolady, ekinshiden durys em qabyldaýyna kómektesedi.
