Burynǵy joldyń 1 shaqyrymy 55 mln. teńge, qazirginiń 1 shaqyrymy 200 mln. teńge
ASTANA. 28 maýsym. QazAqparat - Kólik jáne kommýnıkatsııa mınıstrligi avtomobıl joldaryn saqtaý jáne júk avtokóligimen tasymal jasaýdy baqylaý jóninde kóshpeli otyrys ótkizdi.
Bul máseleni talqylaýǵa sebep bolǵan Qazaqstannyń Qurylysshylar odaǵynyń úndeýi boldy. Onda atalmysh odaq astanalyq nysandardy salý qurylysyna tartylǵan avtokólikterdiń massasy men salmaq júktemeleri boıynsha qoldanystaǵy shekteýlerdi qaıta qarastyrýdy ótingen bolatyn. Bul týraly QR Kólik jáne kommýnıkatsııa mınıstrligi Baspasóz qyzmeti habarlaıdy.
Kólik quraldarynyń massalary men gabarıtteri jónindegi Mınsk kelisimine sáıkes TMD elderiniń bárinde júk kóliginiń jeke biligine túsetin shekti júkteme 10 tonnanyń sheńberinde bolyp engizilgen. Mundaı normatıv TMD elderi avtojoldarynyń tehnologııalyq birtutastyǵyn eskere otyryp taǵaıyndalǵan. Buǵan qosa mundaı praktıka tek TMD elderi ǵana emes, basqa da shet elderde qoldanylady.
Avtomobıl joldary komıtetiniń tóraǵasy Zamır Saǵynovtyń aıtýynsha, bilikke túsetin júkteme jol jamylǵysynyń qabatyna baılanysty. 1985 jyldan buryn salynǵan jol bólikteri 3 qabattan turatyn jáne 8 tonna júktemege eseptelgen bolatyn. Ondaǵy bir kılometr joldyń quny 55 mln. teńgeni quraıtyn.
2005 jyldan bastap shekti júktemesi 13 tonna bolatyn joldar salyna bastaldy. Mundaı joldyń 1 kılometriniń quny 200 mln. teńgeni quraıdy.
Qazirgi ýaqytta respýblıkalyq júıedegi uzaqtyǵy 23 myń 500 km joldyń 19 633 shaqyrymy bilikke túsetin salmaq 6-8 tonnaǵa, al 1 886 km (onyń 915 km «Batys Eýropa - Batys Qytaı» dálizi quramynda) - 13 tonnaǵa dep arnalǵan.
«QazjolǴZI» AQ ótkizgen zertteýlerdiń nátıjesinde avtokólik quraldarynyń júk kóterimdiligin arttyrǵan saıyn jáne bilikke túsetin júktemege qatysty shekteýdi buzý avtojoldardyń jyldam buzylýy men olardyń paıdalaný merziminiń birneshe ese qysqarýyna ákelip soqtyrýda. Bundaı jaǵdaı qurylys qarqyny ekpindi júrgizilip jatqan, onyń ishinde Astana sııaqty óńirlerde asa ózekti máselege aınalyp otyr.
Kezdesý barysynda ǵylymı ınstıtýttyń sarapshylary keńeske qatysýshylarǵa júktemesi artyq avtokóliktiń jol jamylǵysyna qanshalyqty áser etetindigin kózbe-kóz kórsetti, sonymen birge joldy bulaı paıdalanýdyń saldary men ony qalpyna keltirýge jumsalatyn qarjy kólemi jaıynda málimdedi.
Esterińizge sala keteıik, QR KKM 2013 jyldan bastap júk kóligin baqylaýdyń avtomattandyrylǵan júıesin engizýdi josparlaýda.
