Burynǵy jemqorlardy jumysqa qabyldaǵan adamǵa 300 myń teńge aıyppul salynady

NUR-SULTAN. QazAqparat - Buryn sybaılas jemqorlyq qylmysyn jasaǵan adamdardy jumysqa qabyldaǵany úshin memlekettik organnyń nemese ulttyq kompanııanyń basshysy óz qaltasynan 100 AEK kóleminde aıyppul tóleıdi, - dep habarlaıdy QazAqparat tilshisi.

Bul jóninde QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov arnaıy brıfıng barysynda málim etti.

«Bul jerde mańyzdy másele – sybaılas jemqorlyq qylmysyn jasaǵan adamdardy jumysqa ornalastyrýǵa tyıym salý týraly talap buǵan deıin tek memlekettik qyzmet pen kvazımemlekettik sektordyń basshy laýazymdaryna qatysty bolǵanyn atap ótkim keledi. Endi bıyl jyl basynan bastap kúshine engen Eńbek kodeksine engizilgen túzetýlerge sáıkes sybaılas jemqorlyq úshin sottalǵan adamdardy kez kelgen kvazımemlekettik sektor laýazymyna qabyldaýǵa tolyq tyıym salyndy», – dedi Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov.

Aıta keteıik, brıfıngte Bektenov Qazaqstan Respýblıkasynyń Ákimshilik quqyq buzýshylyqtar týraly Kodeksine engizilgen ózgerister týraly aıtty.

«20 naýryzda Memleket basshysy «Qazaqstan Respýblıkasynyń Ákimshilik quqyq buzýshylyqtar týraly Kodeksine ózgerister engizý týraly» Zańǵa qol qoıdy.

Zań sáýirdiń 5-inen bastap qoldanysqa engizildi.

Atalǵan Zań aıasynda ákimshilik sybaılas jemqorlyq quqyq buzýshylyqtar týraly hattamalar jasaý quzireti Sybaılas jemqorlyqqa qarsy qyzmetke bekitildi.

Ákimshilik quqyq buzýshylyqtardyń jolyn kesý – jemqorlyq kórinisteriniń aldyn alýdyń tıimdi quraly.

Agenttiktiń tıisti fýnktsııasy Memleket basshysynyń Jarlyǵymen bekitilgen Erejede de kózdelgen»,- dedi Sybaılas jemqorlyqqa qarsy is-qımyl agenttigi tóraǵasynyń birinshi orynbasary.