Burynǵy vıtse-mınıstr Shaıahmetovtiń isine baılanysty sot otyrysy BAQ úshin ashyq ótedi
ASTANA. QazAqparat - Burynǵy Bilim jáne ǵylym vıtse-mınıstri Saıat Shaıahmetovtiń isine qatysty sot úderisine buqaralyq aqparat quraldary tolyq qatysýǵa quqyly boldy. Búgin Astana qalasy № 2 Almaty aýdandyq sotynda sybaılas jemqorlyq boıynsha aıyptalǵan burynǵy Bilim jáne ǵylym vıtse-mınıstri Saıat Shaıahmetovtiń isine qatysty alǵashqy sot otyrysynda sýdıa Baqytbek Syzdyqov osyndaı sheshim shyǵardy.
Toqtala ketetin jaıt, sot otyrysy bastalǵanda sotqa aıyptalýshy retinde qatysýshy «Qazaqstan Respýblıkasy turǵyzylyp jatqan bilim jáne ǵylym nysandary dırektsııasy» JShS bas dırektory A.Paktyń qorǵaýshysy jáne basqa da qorǵaýshylar BAQ ókilderi otyrysqa kedergi keltiredi degendi alǵa tartyp, olardy isti qaraý barysyna qatystyrmaý týraly ótinish bildirgen edi.
Alaıda S.Shaıahmetovtiń qorǵaýshysy Nurlan Beısekeev sýdıadan sot otyrysyn BAQ úshin ashyq etýdi surady. «Sotty ashyq ótkizý arqyly bizdiń elimizdiń azamattary sýdıa aldynda aıyp taǵylǵan adamǵa qandaı úkim shyǵarylǵanyn, jalpy sot isi qalaı ótetinin bilip otyrady. Sonymen qatar, BAQ-tyń qatysýy belgili bir jaǵdaıda qajettilik, sondyqtan men áriptesterimniń pikirine qosyla almaımyn. Qoǵam bul is týraly muqııat bilýleri kerek. Aıyptalýshy retinde tanylǵan tulǵalar shyn máninde kináli me, qylmys quramy bar ma, qandaı aıǵaqtar usynylǵan? Osyǵan oraı, men BAQ ókilderiniń sot isiniń barysyna tolyǵymen qatysqanyn suraımyn», - deı kele advokat N. Beısekeev tek sot otyrysy zalynda tártip bolsa degen jalǵyz tilegin jetkizdi.
Qorǵaýshylardyń pikirinen soń sýdıa B. Syzdyqov BAQ ókilderine sot isine bastan-aıaq qatysý quqyǵyn qaldyrdy.
Eske sala keteıik, 2013 jyldyń 1 qarashasynda qarjy polıtsııasy S.Shaıahmetovke qatysty qylmystyq isti tergeýdi aıaqtaǵan bolatyn. Bul rette eks-vıtse-mınıstr Óskemende 700 oryndyq bilim berý mekemesi qurylysy kezinde qyzmet ókilettigin teris paıdalandy dep aıyptalyp otyr. Ol memleketke 1,1 mlrd. teńge kóleminde shyǵyn keltirdi delinedi.
Budan bólek, sotta aıyptalýshy retinde «Qazaqstan Respýblıkasy turǵyzylyp jatqan bilim jáne ǵylym nysandary dırektsııasy» JShS bas dırektory Aleksandr Pak, «Servıs JAK» JShS burynǵy bas dırektory Roman Kıreev qatysýda. Olarǵa bıýdjet qarjysyn alaıaqtyq jolmen jymqyrdy degen aıyp taǵylǵan.
