Burynǵy tóraǵaǵa qatysty qylmystyq is aıaqtaldy - qarjy polıtsııasy
ASTANA. Qyrkúıektiń 3-i. QazAqparat /Gúlnár Jandaǵulova/ - Ekonomıkalyq qylmysqa jáne sybaılas jemqorlyqqa qarsy agenttik memleket qarjysyn talan-tarajǵa saldy dep aıyptalyp otyrǵan Aýyl sharýashylyǵy mınıstrliginiń Agroónerkásiptik keshendegi memlekettik ınspektsııa komıtetiniń burynǵy tóraǵasyna qatysty qylmystyq isti aıaqtady, dep habarlady búgin elordada ótken baspasóz máslıhatynda qarjy polıtsııasynyń resmı ókili Murat Jumanbaı.
«Agenttik Serik Súleımenovtyń ústinen qozǵalǵan qylmystyq istiń óndirisin aıaqtady, aıyptalýshy qazir is materıaldarymen tanysýda», dedi M.Jumanbaı óz sózinde.
S.Súleımenov 68,2 mıllıon teńge somanyń (465 myń dollar) 5,2 myń tonna astyǵynyń shirip ketýine jáne 168 mıllıon teńge somanyń (1,1 mıllıon dollar) 7 myń tonna kólemindegi astyqtyń talan-taraj bolýyna janama qatysy bar dep aıyptalǵan bolatyn. Sheneýnik is nasyrǵa shappaı turyp, osy faktilerdi teksergen qarjy polıtsııasynyń qyzmetkerine mamyrdyń 15-inde 50 myń para usynyp, isti jyly jaýyp tastamaqshy bolǵan. Sheneýnik mamyrdyń 22-sinde aqsha berý ústinde, bultartpas aıǵaqpen ustaldy. Kelesi kúni sot sanktsııasymen qamaýǵa alyndy.
Kelesi kúni Súleımenovtyń kabınetin tintý kezinde onyń seıfinen 123,4 myń dollar jáne 5,4 mıllıon teńge aqsha tabylǵan jáne tárkilengen.
«Súleımenov qamaýǵa alynǵannan keıin Agenttikke kásipkerlerden sheneýniktiń reıderlik áreketteri men onyń turaqty para alyp otyrǵandyǵy týraly basqa da aryz-shaǵymdar tústi. Búginde qoldanystaǵy qylmystyq is júrgizý zańnamasyna sáıkes, sol shaǵymdar boıynsha tekserýler júrgizilip jatyr, olardyń qorytyndysy boıynsha protsessýaldyq sheshim qabyldanatyn bolady»,- dep atap kórsetti qarjy polıtsııasynyń resmı ókili M.Jumanbaı.
