Burynǵy premer S. Ahmetovke otbasylyq bıznes múddelerin kózdedi degen aıyp taǵylýda (FOTO)
QARAǴANDY. QazAqparat - Qaraǵandyda qylmystyq is jónindegi mamandandyrylǵan aýdanaralyq sotta QR burynǵy premer-mınıstri Serik Ahmetov, oblystyń burynǵy ákimi Baýyrjan Ábdishev, basqa da burynǵy sheneýnikter men bıznesmenderge qatysty is boıynsha aıyptaý aktisi jarııalanýda.
Tergeý nusqasy boıynsha S. Ahmetov 2010 jyldan bastap 2014 jyl aralyǵy kezeńinde aýyr jáne asa aýyr sybaılas jemqorlyq qylmystaryn jasady.
S.Ahmetov otbasylyq bıznes múddelerin kózdegeni jáne týystary men tanystary arqyly kásipkerlik júrgizgeni úshin aıyptaldy.
«2011 jyly aqpanda memlekettik baǵdarlamany iske asyrýǵa jergilikti bıýdjetten 100 mln teńge bólindi. S. N. Ahmetov óz qolyndaǵy aqparatty, sondaı-aq óz qyzmettik ókilettigin asyra paıdalanyp, otbasylyq bıznes úshin paıda tabý men artyqshylyqtar alý qylmystyq nıetin iske asyrǵan, ol metall buıymdaryn ystyq myryshtaý qyzmetin kórsetetin «Bolat Myrysh» JShS (senimdi tulǵa arqyly teń quryltaıshy D. Syrym onyń uly Ahmetov D.S. basshysy - onyń senimdi tulǵasy - R.K. Ájimuratov, dırektordyń orynbasary - onyń baýyry B.N. Ahmetov) men olarmen úlestes «Bolat Myrysh» Saýda úıi» JShS kásipornyn (R.K Ájimuratov jalǵyz quryltaıshysy) Qaraǵandy qalasy kóshelerin syrttan jaryqtandyrý tiregin aýystyrý boıynsha merdiger retinde tartqan», - delingen habarlamada.
Osylaısha osyndaı jumys júrgizetin kásiporyndar úshin kemsitýshilik jaǵdaı qalyptastyrǵany atap ótiledi. Memleketke keltirilgen jalpy shyǵyn 202 mln teńgeni quraıdy.
Kelesi epızod Qaraǵandyda «Kólik-logıstıkalyq kesheni» JShS qurylysyna jer ýchaskesin berýge baılanysty, S. Ahmetov memlekettik qarajat esebinen ilespe ınfraqurylymmen jeke bıznesin qurǵan. Bul rette joba «BJK-2020» baǵdarlamasy boıynsha qoldaý aldy. Aıypta senimdi tulǵa arqyly ınvestor retinde Ulybrıtanııadaǵy sheteldik kompanııa tirkelgeni kórsetilgen.
Sotta istiń 21 fıgýrantyna qatysty aıyptaý aktisi jarııalandy. Úshinshi kúni kólemdi qujatty úsh prokýror Dıar Ádilov, Galına Kerdekaeva jáne Raýan Tobyqov kezekpen oqıtyn bolady. Aıypty jarııalaý apta sońynda aıaqtalady dep kútilýde, sodan keıin sot basqa talqylaý rásimderine kirisedi.
Eske salsaq, S. Ahmetovke jáne basqa da fıgýranttarǵa qatysty qylmystyq is Qaraǵandy oblysy qylmystyq ister jónindegi mamandandyrylǵan aýdanaralyq sotqa 2015 jylǵy 13 shildede túsken. 14 shildede ár sottalýshyǵa statıstıkalyq kartochka tirkeldi. Qylmystyq is avtomatty túrde sýdıa Islamhan Esenbaevqa berildi.
Sybaılas jemqorlyq isi boıynsha barlyǵy 21 adam tergelýde. Olarǵa qyzmet babyn asyra paıdalandy, bıýdjet qarajatyn urlady jáne kásipkerlik qyzmetke zańsyz aralasty degen aıyptar taǵylǵan. S.Ahmetov sondaı-aq asa iri kólemde para alýǵa aıyptalýda. Qylmystyq is materıaldary 300 tomnan asady.
Basty sot talqylaýy 10 tamyzda bastaldy.
