Burynǵy premer-mınıstr S. Ahmetovtiń isi boıynsha tóraǵalyq etýshi sýdıaǵa narazylyq qoldaýhaty qabyldanbady (FOTO)
QARAǴANDY. QazAqparat - Qaraǵandyda sot sybaılas jemqorlyq jasady dep aıyptalǵan burynǵy premer-mınıstr S. Ahmetovtiń jáne Qaraǵandy oblysynyń basqa da laýazymdy tulǵalary men bıznesmenderiniń isi boıynsha tóraǵalyq etýshi sýdıaǵa narazylyq qoldaýhatyn qabyldamady, dep habarlady QazAqparat tilshisi.
«Sýdıa Islamhan Esenbaevqa narazylyq bildirý ótinishi qanaǵattandyrylmasyn, qaýly shaǵymdanýǵa jatpaıdy», - dep Qaraǵandy oblysy qylmystyq is jónindegi mamandandyrylǵan aýdanaralyq sotynyń sýdıasy Tólegen Tańsyqov sheshimdi oqydy.
Sýdıaǵa narazylyq bildirý qoldaýhatyn sottalýshylardyń biri Aıdos Jákenovtiń (Qaraǵandy qalasy TKSh, jolaýshylar kóligi, avtomobıl joldary basqarmasynyń burynǵy bastyǵy) advokaty Meıram Sháımerdenov málimdedi. Ol sot shaǵymdaný quqyǵyn qorǵaýǵa kedergi keltirgenin málimdedi. M. Sháımerdenov qylmystyq isti toqtatý týraly qoldaýhattan bas tartý týraly birinshi ınstantsııadaǵy sot qaýlysyna appelıatsııalyq alqaǵa jeke shaǵym berilgenin habarlady.
«Jeke shaǵymdy qaraǵanǵa deıin basty sot talqylaýyn taǵaıyndap, sýdıa is nátıjesine jeke nemese janama múddeliligin bildirdi», - dep sanaıdy advokat.
Eske salsaq, S. Ahmetovke jáne basqa da fıgýranttarǵa qatysty qylmystyq is Qaraǵandy oblysy qylmystyq ister jónindegi mamandandyrylǵan aýdanaralyq sotqa 2015 jylǵy 13 shildede túsken. 14 shildede ol ár sottalýshyǵa statıstıkalyq kartochka tirkeldi. Qylmystyq is avtomatty túrde sýdıa Islamhan Esenbaevqa berildi.
Sybaılas jemqorlyq isi boıynsha barlyǵy 21 adam tergelýde. Olarǵa qyzmet babyn asyra paıdalandy, bıýdjet qarajatyn urlady jáne kásipkerlik qyzmetke zańsyz aralasty degen aıyptar taǵylǵan. S.Ahmetov sondaı-aq asa iri kólemde para alýǵa aıyptalýda. Qylmystyq is materıaldary 300 tomnan asady.
Tergeý nusqasy boıynsha, S.Ahmetov 1 mlrd. teńgeden astam bıýdjet qarajatyn jymqyryp, 2,4 mln. AQSh dollary kóleminde para aldy degen kúdik bar.
