Burynǵy polıtseı iri mólsherde geroın satqany úshin 10 jylǵa sottaldy
ÓSKEMEN. 13 aqpan. QazAqparat - Shyǵys Qazaqstan oblystyq soty úkim shyǵardy: Rıdderden kelgen burynǵy polıtseı Edýard N. esimdi azamat iri mólsherde geroın satqany úshin múlkiniń tárkilenýimen 10 jylǵa sottaldy. Ol jazasyn qatań rejımdegi túzeý mekemesinde óteıtin bolady.
Qylmystyq istiń materıaldaryna sáıkes, Rıdderlik AІІB-niń burynǵy qyzmetkeri belgisiz bireýden 999,7181 gramm salmaqta geroın satyp alyp, ony kishkene bólshekterge bóle otyryp, esirtkige táýeldi adamdarǵa sata bastaǵan.
Edýard N. Sokolok taýynda K. esimdi azamatqa geroındi birneshe partııamen satýǵa árekettengen. Ol nashaqorǵa esirtkini satyp, ol úshin 190 myń teńge somasynda qarajatty alý kezinde ustaldy. Onyń kıiminen 48,9312 gramm salmaqta geroın tabyldy.
Esirtki satýshynyń páterin jáne kóligin tintý kezinde iri mólsherde geroın men 2,5 mln.-nan astam teńge tárkilendi.
