Burynǵy mádenıet mınıstri Jeksenbek Erkimbekov ómirden ozdy
ASTANA. QazAqparat - 2018 jyldyń 21 qańtarynda elimizdiń kórnekti memleket jáne qoǵam qaıratkeri, Qazaqstanyń eńbek sińirgen óner qaıratkeri, otandyq mádenıettiń órleýine ólsheýsiz úles qosqan daryn ıesi, on bir jylǵa jýyq Qazaq KSR-niń Mádenıet mınıstri bolǵan Jeksenbek Erkimbekuly Erkimbekov 88 jasyna qaraǵan shaǵynda ómirden ozdy. Bul týraly QR Mádenıet jáne sport mınıstrliginiń baspasóz qyzmeti habarlady.
Baspasóz málimetterine qaraǵanda, J. Erkimbekov 1930 jyly 5 qańtarda Almaty oblysy, Eskeldi aýdany, Bıǵash aýylynda dúnıege kelgen.
Jeksenbek Erkimbekov Almaty memlekettik konservatorııasyn dombyrashy-dırıjer mamandyǵy boıynsha bitirip, Qazaq radıo komıtetiniń janyndaǵy ult-aspaptar orkestrinde, Qurmanǵazy atyndaǵy halyq aspaptar orkestrinde dombyrashy boldy. Ol Qurmanǵazy orkestri quramynda Býharest qalasyndaǵy Dúnıejúzilik jastar men stýdentterdiń ІV festıvaline qatysyp, altyn medalmen marapattaldy»,-delingen habarlamada.
1956-1958 jyldary Almaty horeografııa ýchılışesiniń dırektory, Qazaq radıosy mýzyka redaktsııasynyń kórkemdik jetekshisi, Qazaq KSR-i án-bı ansambliniń dırektory, 1959-1961 jyldary Qazaqstan Kommýnıstik partııasy Ortalyq Komıtetiniń mádenıet sektorynyń meńgerýshisi, 1961-1966 jyldary Abaı atyndaǵy Qazaq memlekettik akademııalyq opera jáne balet teatrynyń dırektory qyzmetterin atqardy.
1966-1976 jyldary Qazaq KSR-i Mádenıet mınıstrliginde óner basqarmasynyń bastyǵy, mınıstrdiń orynbasary, 1976-1987 Mádenıet mınıstri bolyp qyzmet etti.
Jeksenbek Erkimbekov Qazaq KSR-niń Mádenıet mınıstri bolyp qyzmet atqarǵan kezinde mádenıet salasynyń kadrlar daıarlaý deńgeıi aıtarlyqtaı ósip, ansamblder men orkestrler quryldy, jańa teatrlar, fılarmonııalar, kitaphanalar, mádenı ortalyqtar, jyljymaly avtoklýbtar jáne avtomýzeıler ashyldy.
Almaty qalasynda Respýblıka saraıy, M. Áýezov atyndaǵy jáne M. Lermontov atyndaǵy teatrlardyń ǵımarattary soǵylyp, Almaty horeografııalyq ýchılışesi, K. Báıseıitova atyndaǵy jáne A. Jubanov atyndaǵy daryndy balalar mýzyka mektepteriniń, P. Chaıkovskıı atyndaǵy Almaty mýzyka ýchılışesiniń jataqhanasymen birge jańa ǵımarattary boı kóterip, Ortalyq kontsert zaly, Ulttyq mýzeı, Á. Qasteev atyndaǵy mýzeı ashyldy. Elimiz boıynsha jalpy sany 200-ge jýyq mádenıet mekemeleri quryldy.
Budan basqa, Jeksenbek Erkimbekuly Qurmanǵazy atyndaǵy Qazaq ulttyq konservatorııasynyń qurmetti professory, Qazaq KSR-i Joǵarǵy Keńesiniń depýtaty boldy.
Jeksenbek Erkimbekuly Erkimbekovtiń eńbegi memlekettik joǵary nagradalarmen marapattaldy. Ol 2 ret «Qurmet» ordeni jáne birneshe medaldarmen marapattalǵan.
«Jyldar óter, biraq abzal tulǵa Jeksenbek Erkimbekuly Erkimbekovtiń jarqyn beınesi el jadynda máńgi saqtalady.
Marqumnyń týǵan-týysqandarynyń qaıǵylaryna ortaqtasyp, kóńil aıtamyz»,-delingen mınıstrliktiń habarlamasynda.
Marqumdy aqtyq saparǵa shyǵaryp salý rásimi 23 qańtarda, saǵat 10.00-de Almaty qalasynda Abaı atyndaǵy akademııalyq memlekettik opera jáne balet teatrynda ótedi.
