Burynǵy qylmystary úshin boı tasalap júrgen 107 adam ustaldy - ІІM
NUR-SULTAN. QazAqparat - Ótken aptada burynǵy qylmystary úshin jasyrynyp, boı tasalap júrgen 107 adam ustaldy. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.
«Ótken aptada Іshki ister mınıstrligi «Qańǵybas» aýqymdy aldyn alý sharasyn ótkizdi. Bul shara - turaqty turatyn jeri joq, kezbelikke salynyp ómir súretin azamattardyń arasynda qylmys pen quqyqbuzýshylyqty anyqtaý maqsatynda uıymdastyrylyp otyr. Operatsııa nátıjesinde 5 500 adam anyqtalyp, olardyń qandaı da bir qylmysqa qatystylyǵy ortaq aqparattyq baza arqyly tekserildi«, - dedi ol.
Onyń atap ótýinshe, eki kún ishinde polıtsııa qyzmetkerleri osy baǵyttaǵy 55 qylmysty ashty. Burynǵy qylmystary úshin jasyrynyp, boı tasalap júrgen 107 azamat ustaldy. Joǵalyp ketkenderdiń sanatynda júrgen 72 adam izdestirilip tabyldy. «Máselen, Almaty qalalyq polıtsııa departamentiniń qyzmetkerleri 2012 jyly Almaty qalasynda qarýly toppen 3 adamdy óltirý qylmysyna qatysy bar kúdiktini qolǵa túsirdi. Pavlodarlyq polıtseıler 2012 jyly Reseı Federatsııasynyń Omby oblysynda tonaý jasaǵan kúdiktini ustady. Al Almaty oblysy Іle aýdanynda 2009 jyldyń qazan aıynan beri iz-túzsiz joǵalyp ketken azamat tabyldy«, - dedi Nurdildá Oraz.
