Burynǵy kúıeýin jeli arqyly balaǵattaǵan áıel sotqa tartyldy
AQTÓBE. QazAqparat - Aqtóbe oblysy, Qarǵaly aýdanynyń 28 jastaǵy turǵyny burynǵy kúıeýine balaǵat sózder jazǵany úshin sot aldynda jaýap berdi, dep habarlaıdy QazAqparat tilshisi.
Aqtóbe oblysy, Qarǵaly aýdandyq soty áleýmettik jeli arqyly bir-birimen urysyp, balaǵat sóz aıtqan erli-zaıyptyǵa qatysty isti qarady.
Іs materıalyna súıensek, Marına Tanabergenovaǵa Qylmystyq kodekstiń «Qorlaý» baby boıynsha aıyp taǵyldy. Aıyptalýshy M.Tanabergenova jábirlenýshi R. Tanabergenovke «WhatsApp» jelisi arqyly balaǵat sózder jiberedi. Habarlamada ol burynǵy kúıeýin qańǵybasqa, esekke teńegen. Sóıtip, Kodekstiń qorlaý, ıaǵnı, basqa adamnyń abyroıy men qadir-qasıetin ádepsiz túrde kemsitý tarmaǵy boıynsha saraptama taǵaıyndalyp, habarlamadaǵy sózder tekserildi. Sot otyrysy kezinde M.Tanabergenova óziniń aıybyn tolyq moıyndap, ókinetinin jetkizdi. Al jábirlenýshi R.Tanabergenov burynǵy áıeli ózin, balalaryn, týǵan-týystaryn únemi balaǵattaıtynyn aıtyp berdi. Sot otyrysy kezinde kýágerler de burynǵy erli-zaıyptylardyń únemi urysyp, jaljaldasatynyn jasyrmady.
Sot úkimimen Marına Tanabergenova aıypty dep tanylyp, oǵan 56 725 teńge memlekettik shyǵyndy óteý mindetteldi. Al azamattyq aryz boıynsha aıyptalýshy burynǵy kúıeýi Rýstam Tanabergenovke 10 myń teńge moraldyq zııan tóleıdi. Sot úkimi kúshine engen joq.
Aıta keteıik, aıyptalýshy M.Tanabergenovanyń burynǵy kúıeýi R.Tanabergenov moraldyq shyǵyn retinde 600 myń teńge talap etken bolatyn. Sot aıyptalýshynyń ókinetinin, kámeletke tolmaǵan balalarynyń bar ekenin eskerdi. Sonymen qatar, azamattyq aryz boıynsha aıyptalýshy memleketke 48 150 teńge tóleıdi.
