Burynǵy qudasynan qalyńmal múlkin talap etken
NUR-SULTAN. QazAqparat - Sot talapkerlerge qalyńdyq úshin berilgen qalyń maldy qaıtarý týraly talapty qanaǵattandyrýdan bas tartty, dep habarlaıdy QazAqparat Nur-Sultan qalasynyń sotyna silteme jasap.
Vedomstvonyń málimetinshe, talapkerler J men A sotqa salt-dástúr negizinde qalyńdyq jaqqa berilgen qalyń mal men múlikti (ton, zergerlik jıyntyqtar, kostıýmder jáne t. b.) burynǵy qudasy – jaýapker S-dan qaıtaryp alý týraly talappen júgingen.
«Talapkerler men jaýapkerdiń balalarynyń nekede turǵandary anyqtalǵan. Alaıda, 2021 jyldyń sáýirinde jastar arasyndaǵy neke buzylǵan.
Sot sheshimimen talapty qanaǵattandyrýdan bas tartyldy», - dep jazdy elordalyq sot.
Sot qalyńdyq úshin qalyń mal túrindegi aqshalaı soma men basqa da zattar syılyq retinde berildi jáne olardy jaýapkerden talap etýge negiz joq degen qorytyndyǵa keldi. Sonymen qatar, bul zattardy tek jaýapker ǵana emes, qalyńdyq jaqtan basqa da adamdar syıǵa alǵan.
Sot sheshimin ózgerissiz qaldyra otyryp, apellıatsııalyq sot kúıeý men qalyńdyqtyń ata-analarynyń arasyndaǵy syılyqtarmen ózara almasý boıynsha tıisti rásimder qazaqtyń ulttyq dástúrlerine sáıkes júrgizilgenin atap ótti.
«Rásimdik is-sharalar kezinde berilgen múlikti jáne zattardy qaıtarý talaby zańnamada kózdelmegen, tıisinshe oryn alǵan jaǵdaı boıynsha taraptar arasynda qandaı da bir mindettemeler týyndaǵan joq», - dep jazdy vedomstvodan.
