Burynǵy QTL-dar jumysyna bireýlerdiń aralasýyna jol berilmeıdi - Qaırat Ábdirahmanov
ASTANA. QazAqparat - QR Syrtqy ister mınıstri Qaırat Ábdirahmanov burynǵy qazaq-túrik lıtseıleriniń (qazirgi «Bilim-ınnovatsııa lıtseıleri») qyzmetine bireýlerdiń aralasýyna jol bermeıtindigine ýáde etti, dep habarlaıdy QazAqparat.
«Ózderińiz bilesizder, elimizdiń quzyrly mınıstrligi (QR BǴM) tolyqqandy jaýabyn bergen bolatyn. Taǵy da naqtylap óteıin, qazaq-túrik lıtseıleri rebrendıng úderisinen ótti. Búginde olar jańa ataýǵa ıe boldy, sondaı-aq ózderiniń oqý baǵdarlamalarynda Qazaqstanda bekitilgen baǵdarlamany negizge alyp otyr. Oqý oryndary tıisti jergilikti atqarýshy organdardyń basshylyǵymen qyzmet etýde. Atap aıtqanda, Qazaqstandaǵy bilim berý mekemeleriniń qyzmetine bireýlerdiń aralasýyna jol bermeımiz», - dedi Ábdirahmanov Májilistegi Úkimet saǵatynan keıin.
Budan buryn habarlanǵandaı , QR Bilim jáne ǵylym mınıstrligi burynǵy QTL-dar Túrkııa bilim mınıstrliginiń basqarýyna ótpeıtindigin málimdegen bolatyn.
Aıta keter jaıt, «Bilim-ınnovatsııa lıtseıi» - jurtshylyq arasynda joǵary bedel men qurmetke ıe bolyp otyrǵan bilim berý mekemesi. Qazaq-túrik lıtseıleriniń bári 2016 jyly «Bilim-ınnovatsııa lıtseıleri» bolyp qaıta qurylǵan.
