Burynǵy qazaqstandyq magnattyń Londondaǵy jyljymaıtyn múlki aýktsıonǵa qoıyldy
ASTANA. QazAqparat - BTA banki tóraǵasynyń burynǵy orynbasary Jaqsylyq Jarymbetovten tárkilengen quny 11 mln. fýnt sterlıngten asatyn jyljymaıtyn múlik Londonda aýktsıonǵa qoıyldy.
Quny 4,5 mln fýnt sterlıng bolatyn Winchmore Hill jekejaıy bar jyljymaıtyn múliktiń satylatyny týraly habar Brıtanııanyń premeri Devıd Kameron jemqorlyqqa qarsy sammıtti ashyp, osy aptada offshorlyq kompanııalardyń arqasynda jasyrynatyn jyljymaıtyn múlikti satyp alýshylarmen kúresetinin aıtqan soń BAQ-ta paıda boldy.
Bir kezderi brıtanııalyq ánshi Rob Stıýarttyń ıeliginde bolǵan záýlim úıde baqshasy, jabyq basseıni jáne saýna bar.
Brıtanııalyq Evening Standard agenttigi habarlaǵandaı, Jarymbetov záýlim úıdi Brıtanııalyq Vırgın araldarynda tirkelgen Smaland Property Holdings kompanııasy arqyly 2009 jyly 5,6 mln fýnt sterlıngke satyp alǵan.
Quny 4 mln fýnt sterlıngti quraıtyn Longwood derbes úıi aýktsıonǵa qoıyldy. Quny 2,2 mln fýnt sterlıngti quraıtyn Bıshops avenıýde ornalasqan úsh bólmeli páter satylýǵa daıyndalyp jatyr.
Basylym atap ótkendeı, QR Joǵarǵy soty Jaqsylyq Jarymbetov qazaqstandyq mıllıarder Muhtar Áblázovke BTA bankiniń qarajatyn zańsyz jymqyrýǵa kómektesti dep qaýly etken. Eki bıznesmen de Londonǵa qashqan.
