Burynǵy ǵashyǵyna 20 jerden pyshaq salǵan qaraǵandylyq 11 jylǵa sottaldy
Kisi óltirýge oqtalǵany úshin aıyptalyp otyrǵan 23 jastaǵy qaraǵandylyqqa qatysty qylmystyq is Qaraǵandy oblysynyń qylmystyq ister jónindegi mamandandyrylǵan aýdanaralyq sotynda qaraldy. Sottalýshy óziniń burynǵy qyzyn óltirgisi kelmegenin aıtyp, kinásin moıyndamady. Sottalýshynyń advokaty sottan aıyptaý babyn qaıta qaraýdy surady.
Alaıda sýdıa Bekzat Shalǵymbaev is boıynsha jınalǵan barlyq materıaldardy zerttep, protseske qatysýshylardyń barlyǵyn tyńdap, sottalýshyny 11 jyl 3 aıǵa bas bostandyǵynan aıyrdy. Sot úkimi áli zańdy kúshine engen joq. Sottalýshy men onyń qorǵaýshysy Qaraǵandy oblystyq sotyna apellıatsııalyq shaǵym túsirdi.
Esterińizge sala keteıik, ótken jyldyń qazan aıynda 23 jastaǵy er adam óziniń burynǵy súıiktisine 20 pyshaq jaraqatyn salyp, qylmys ornynan qashyp ketti. Bir aıdan keıin tártip saqshylary ony ustady.