Burynǵy Densaýlyq saqtaý mınıstri S.Qaıyrbekova ómirden ozdy
ASTANA. QazAqparat - Qazaqstan Respýblıkasynyń Premer-Mınıstri Kárim Másimov óziniń tvıtter-akkaýntynda Salıdat Qaıyrbekovanyń qaıtys bolǵanyn habarlap, týǵan-týystaryna kóńil bildirgen.
«Salıdat Zekenqyzy Qaıyrbekovanyń mezgilsiz qaıtys bolýyna baılanysty marqumnyń týǵan-týystaryna kóńil aıtamyn»,- dep jazǵan K.Másimov.
Esterińizge sala keteıik, 23 maýsym kúni Salıdat Qaıyrbekovanyń aýyr halde aýrýhanaǵa túskeni belgili bolǵan edi.
S.Qaıyrbekova 1961 jylǵy 1 tamyzda Qaraǵandy oblysynda dúnıege kelgen. 1984 jyly Qaraǵandy memlekettik medıtsına ınstıtýtyn «emdeý isi» mamandyǵy boıynsha, 2002 jyly E.A.Bóketov atyndaǵy Qaraǵandy memlekettik ýnıversıtetin quqyqtaný mamandyǵy boıynsha bitirgen. 2001-2006 jyldary - Qazaq memlekettik medıtsına akademııasynyń qoǵamdyq densaýlyq jáne densaýlyq saqtaýdy basqarý kafedrasynyń izdenýshisi. 1984-1998 jyldary Qaraǵandy oblysynyń medıtsına uıymdarynda dáriger-nevropatolog, Qaraǵandy kópbeıindi emdeý-dıagnostıkalyq birlestigi bas dárigeriniń orynbasary bolyp jumys istedi. 1998-2001 jyldary - Qaraǵandy oblystyq densaýlyq saqtaý basqarmasynyń medıtsınalyq kómekti uıymdastyrý bóliminiń bastyǵy, Qaraǵandy oblystyq eńbek, jumyspen qamtý jáne halyqty áleýmettik qorǵaý basqarmasynyń № 5 medıtsınalyq-áleýmettik saraptama komıssııasynyń tóraıymy. 2001-2004 jyldary Qazaqstan Respýblıkasy Densaýlyq saqtaý mınıstrliginiń bólim bastyǵy, basqarma bastyǵy, Emdeý-profılaktıkalyq jumys departamenti dırektorynyń orynbasary, Mınıstrliktiń Apparat basshysy qyzmetin atqardy.
2004-2006 jyldary Qazaq memlekettik medıtsına akademııasynyń prorektory boldy. 2006-2008 jyldary - Qazaqstan Respýblıkasynyń Prezıdenti Ákimshiliginiń áleýmettik-ekonomıkalyq taldaý bóliminiń bas sarapshysy, bas ınspektory, áleýmettik-ekonomıkalyq monıtorıng bóliminiń sektor meńgerýshisi. 2008 jylǵy 4 jeltoqsannan bastap Qazaqstan Respýblıkasy Densaýlyq saqtaý mınıstrligi Medıtsınalyq qyzmet kórsetý salasyndaǵy baqylaý komıtetiniń tóraıymy. 2009 jylǵy 5 qazannan bastap Qazaqstan Respýblıkasy Densaýlyq saqtaý mınıstrligi Medıtsınalyq qyzmetke aqy tóleý komıtetiniń tóraıymy. Qazaqstan Respýblıkasy Úkimetiniń Qaýlysymen 2010 jylǵy 23 sáýirinde Qazaqstan Respýblıkasynyń Densaýlyq saqtaý vıtse-mınıstri bolyp taǵaıyndaldy. Qazaqstan Respýblıkasy Prezıdentiniń Jarlyǵymen 2010 jylǵy 7 qazanda Qazaqstan Respýblıkasynyń Densaýlyq saqtaý mınıstri bolyp taǵaıyndaldy. 2014 jylǵy tamyzdan QR Densaýlyq saqtaý jáne áleýmettik qamtý mınıstrliginiń birinshi vıtse-mınıstri boldy. 2015 jyldyń qazan aıynda «Ulttyq medıtsınalyq holdıng» AQ basqarma tóraıymy qyzmetin atqarǵan.
Medıtsına ǵylymdarynyń doktory. «Qurmet» ordenimen marapattalǵan.
