Burynǵy Dahaý kontslageriniń urlanǵan ataqty qaqpasy ornyna qaıtaryldy
ASTANA. QazAqparat - Eki jyl buryn Dahaý kontslagerinde urlanǵan «Arbeit macht frei» («Eńbek adamdy azat etedi») degen jazýy bar tarıhı qaqpa burynǵy kontslagerdiń ornyndaǵy murajaıǵa qaıtaryldy, dep habarlaıdy Bı-Bı-Sı agenttigi.
Salmaǵy 100 kelige tartatyn qaqpa 2014 jyldyń qarasha aıynyń basynda qoldy bolǵan edi.
2016 jyldyń jeltoqsan aıynda Bavarııa polıtsııasy habarlaǵandaı, bul qaqpa Norvegııanyń Bergen qalasynyń mańynan tabylǵan. Sondaı-aq, onyń qalaısha bul elge jetkizilgen jáne onyń joǵalýyna kimniń qatysy bary habarlanbaǵan. Urlyqqa qatysty eshkim tutqyndalmady.
Mıýnhen mańynda ornalasqan Dahaý - Germanııa aýmaǵyndaǵy alǵashqy kontslager bolǵan. Ol 1933 jyly, Adolf Gıtler bılikke kelgennen keıin birneshe aptadan soń ashyldy.
Atalmysh orynda alǵashqyda saıası tutqyndar jazasyn ótegen edi. Keıinnen, Ekinshi dúnıejúzilik soǵys ýaqytynda bul jer ólim lagerine aınaldy. Munda 30 myńnan astam adam - negizinen evreıler men syǵandar óltirildi.
