Burynǵy bilim jáne ǵylym mınıstri «Ustaz mártebesi» týraly zań qabyldaýdy usyndy
ALMATY. QazAqparat - Burynǵy bilim jáne ǵylym mınıstri, belgili memleket jáne qoǵam qaıratkeri, pedagog ǵalym Shámshá Berkimbaeva Almaty ákimdiginde ótken Elbasynyń «Bolashaqqa baǵdar: rýhanı jańǵyrý» maqalasyn taldaýǵa arnalǵan qala aktıviniń jıynynda megapolıs basshysy Baýyrjan Baıbekke «Ustazdar mártebesi» týraly qalalyq máslıhatta zań qabyldanýyn, Almaty boıynsha ustazdardyń mártebesin kóterýge jaǵdaı jasaý qajettigin usyndy, dep habarlaıdy QazAqparat tilshisi.
«Elbasy bilim salasynyń damýyna qashan da kóńil bóledi. Osy maqalasynda Elbasy: «Bilim árdaıym birinshi orynda turýy shart». Sebebi, qundylyqtar júıesinde bilimdi bárinen bıik qoıǵan ult qana tabysqa jetedi», - deıdi. Qalalyq máslıhat depýtattarynyń «Ustaz mártebesi» týraly zań qabyldaýyna bastamashy bolýyńyzdy suraımyn. Bul qoǵamda qoldaý tabar edi. Osydan 25 jyl buryn ıÝNESKO tarapynan «Ustaz mártebesi» týraly ereje qabyldanǵan bolatyn. Kóptegen elder sodan keıin arnaıy zań qabyldady. Bizde joq, ázirshe, bul óte kerek. Sebebi, mektep - ult besigi. Onyń baby bolýy kerek, onyń bapty bolýy ustazǵa baılanysty», - dedi Shámshá Berkimbaeva.
Sonymen qatar, tanymal ustaz, burynǵy bilim jáne ǵylym mınıstri Sh.Berkimbaeva ustaz mártebesin kóterýge qatysty birneshe usynys aıtty.
«Táýelsizdik jyldarynda mektep ómiri, bala tárbıesi, ustaz eńbegi, bala tárbıesine ata-ananyń jaýapkershiligi týraly birde-bir kórkem shyǵarma, birde-bir kórkem fılm bolmady. Múmkin, buǵan ákimshilik tarapynan áleýmettik tapsyrys jasaý kerek shyǵar. Jaqsy ustazdar týraly esse, ocherkter uıymdastyrylyp, ol «Almaty aqshamy» gazetinde arnaıy aıdarmen shyǵyp tursa, keıin jınaq etip shyǵarsaq», degen pedagog ǵalym qazaq mektebiniń tarıhyna sholý jasady.
«Qazaq mektebi aýyr jaǵdaılardy basynan ótkizdi. Ótken ǵasyrda 900-ge jýyq qazaq mektebi jabyldy. Osynyń bári ulttyq sanamyzǵa túsken syzattar, ol áli kete qoıǵan joq. Táýelsizdik jyldary 1300 mektep salynyp, olar negizinen qazaq mektebi bolyp ashyldy. Sol kezdegi astanamyz Almatyda 70 jyl boıy bir ǵana qazaq mektebi boldy. Búginde onyń sany 70-ke jýyqtap qaldy. Bolashaqta 65 aralas mekteptiń basym bóligi qazaq mektebi bolady dep úmittenemiz», - dedi Shámsha Berkimbaeva.
Qala ákimi Baýyrjan Baıbek Shámshá Berkimbaeva tarapynan aıtylǵan usynystardy qoldaıtynyn jetkizip, jaýapty azamattarmen aıtylǵan pikirlerdi taǵy da oı eleginen ótkizetinin aıtty.
