Burynǵy áıeline 22 jerden pyshaq salǵan: Shelek turǵyny qamaýǵa alyndy
Áleýmettik jelide áıeldiń oqıǵasy baıandalǵan jazba jarııalanǵan bolatyn. Onda jábir kórgen áıel 17 jyl otasqan kúıeýi aıaq-asty qol jumsaı bastaǵanyn aıtady. Ózine qaraı myltyqpen oq atqannan keıin, ajyrasqan. Úsh balamen jeke úıge shyqqan. Biraq burynǵy kúıeýi kórgen jerinde ony uryp-soǵýdy jalǵastyrǵan. Býyndyryp óltirý áreketinen keıin sot úkimimen burynǵy kúıeýine oǵan taıanýǵa tyıym salynǵan. Jábirlenýshiniń sózinshe, kezekti ret kezdesip qalǵanda 22 jerden pyshaq jaraqatyn salǵan. Dárigerlerdiń arqasynda aman qalǵan.
«Meni anamyzdyń kózinshe pyshaqtaı bastady. Anam ony ustaýǵa tyrysty. 22 jerden pyshaq jaraqatyn saldy, sonyń úsheýi suǵylǵan jaraqat – ókpege jáne baýyrǵa», - deıdi áıel.
«Atalǵan qylmys 3 qyrkúıek kúni Shelek aýylynda bolǵan. Derek Eńbekshiqazaq aýdanynyń polıtsııa basqarmasynda Sotqa deıingi tergep-tekserýlerdiń biryńǵaı tizilimine QR Qylmystyq kodeksiniń 24-baby 3-bóligi 99-babynyń 1-bóligi (Adam óltirýge oqtalý) boıynsha tirkeldi. Qazirgi ýaqytta istiń barlyq mán-jaıyn jan-jaqty, tolyq jáne obektıvti zertteýdi qamtamasyz etý maqsatynda tıisti saraptamalar taǵaıyndaldy jáne barlyq qajetti tergeý áreketteri júrgizilip jatyr», – dedi Almaty oblysy Polıtsııa departamentinde.
Kúdikti belgilengen tártippen qamaýǵa alyndy. Qylmystyq isti tergeý barysy departament basshylyǵynyń baqylaýynda.