Burynǵy álemdegi eń tajal polıgonnyń biri búgingi ıadrolyq qarýsyzdaný ortalyǵyna aınalyp otyr - Májilis vıtse-spıkeri
ASTANA. Sáýirdiń 19-y. QazAqparat /Qanat Mámetqazyuly/ - Burynǵy álemdegi eń tajal polıgonnyń biri búgingi ıadrolyq qarýsyzdaný ortalyǵyna aınalyp otyr.
Búgin QR Parlamenti Májilisinde «Qazaqstan - beıbitshilik eli» taqyrybynda ótken dóńgelek ústel barysynda Májilis Tóraǵasynyń orynbasary Jánibek Káribjanov osylaı málim etti, dep habarlaıdy QazAqparat.
«Qazaqstanda Semeı ıadrolyq polıgonynyń jabylǵanyna 20 jyl tolyp otyr, osy ýaqyt ishinde birshama sharalar atqaryldy. Burynǵy álemdegi eń tajal polıgonnyń biri búgingi ıadrolyq qarýsyzdaný ortalyǵyna aınalyp otyr. Myńdaǵan adamnyń ómirine zııanyn tıgizgen ıadrolyq polıgon jabylyp, basqalar jete almaı júrgen, qolda bar qýatty qarýdan erikti túrde bas tartqanymyzǵa álem jurtshylyǵy áli kúnge deıin tańǵalady. Árıne, osyndaı tarıhta teńdessiz sharalardy iske asyryp, memleketimizdiń beıbitshilik mekeni retinde tanylýyna Prezıdent N. Nazarbaevtyń eńbegi orasan zor. Keshegi jahandyq sammıtte Elbasynyń halyqaralyq qaıratker retinde túr-tulǵasy taǵy da aıqyndala tústi», dedi vıtse-spıker.
Onyń aıtýynsha, Qazaqstannyń búgingi ıadrolyq-ekologııalyq apat aımaqtary 20-ǵasyrdaǵy qoǵamdyq formatsııalardyń jer betindegi ústemdik ornatýyndaǵy qarýlaný básekesiniń qurbany bolyp otyr.
«Endigi maqsat ıadrolyq qaýipke qatysty qarýlaný oılaryn qaıta boldyrtpaý, Qazaqstannyń beıbitshilik eli retindegi rólin kúsheıtý, Memleket basshysynyń osy baǵyttaǵy bastamalaryn baıandy etip, odan ári damytý turǵysynan barynsha qarymdy qımyldaý bolyp tabylady», - dedi J. Káribjanov.
