Buryn jezókshelikpen aınalysqan adamdar ArtSport aıasynda balalarǵa sabaq bergen

ASTANA. QazAqparat - ArtSport baǵdarlamasyn júzege asyrý barysyn tekserý kezinde 6 myńǵa jýyq balany jalǵan tirkegeni anyqtaldy. Saldarynan 1,1 mlrd teńge bıýdjet qarjysy jymqyrylǵan, dep habarlaıdy QazAqparat QR Bas prokýratýrasynyń baspasóz qyzmetine silteme jasap.

«Tekserý barysynda úıirmeler men sport sektsııalaryna 6 myńǵa jýyq balany jalǵan resimdeý arqyly 1,1 mlrd teńge bıýdjet qarjysynyń urlanǵany anyqtaldy. Keı óńirde (Almaty, BQO, ShQO, Mańǵystaý oblysy) balalarmen bilim-biligi joq, shyǵarmashylyq pen sportqa múldem qatyssyz, tipti buryn jezókshelik jáne jynystyq qolsuǵýshylyq qylmysy úshin sottalǵandar jumys istegen. Al basqa oblystarda úıirme jáne sektsııa zaldary sanıtarlyq talaptarǵa sáıkes kelmegen», - delingen habarlamada.

Sondaı-aq, resmı aqparatta memlekettik shyǵarmashylyq jáne sporttyq tapsyrystardy jarııalaý erejesi «Atameken» ulttyq kásipkerler palatasymen kelisilmegeni aıtylǵan.

Tapsyrys aıasynda sybaılas jemqorlyqqa qarsy bir de bir qorytyndy alynbaǵan.

«Prokýrorlardyń alaıaqtyq, urlyq, para berý jáne para alýdy anyqtaǵan faktileri boıynsha (18 is) sotqa deıingi tergep-tekserý amaly bastaldy. 16 laýazymdy tulǵa tártiptik jaýapkershilikke tartyldy, sol sııaqty 94 bıznes sýbektisiniń quqyǵy qorǵalyp, 50 jaldaý sharty buzyldy», - deıdi vedomstvodan.

Joǵarydaǵy jaıtqa baılanysty Bas prokýratýra ArtSport baǵdarlamasy sharttaryna ózgeris engizilgenin habarlaıdy.

ıAǵnı vaýcher sany bireýge deıin qysqardy (buryn 2 balaǵa deıin jazylý múmkin edi), sonymen qatar sanıtarlyq talaptar kúsheıtilip, eń tómengi jas shegi ózgertildi (buryn erkin kúreske qabyldaý 5 jastan bastalsa, qazir 10 jastan).