Buryn maǵan kirgenderdiń bári bir-bir túıindemeni tyqpalaı beretin - Asanov

ASTANA. QazAqparat - Qazaqstanda prokýrorlardy irikteý jumysymen táýelsiz sarapshylar aınalysady. Al mamandardyń biliktiligin baǵalaý barysynda sarapshylardyń ózderi úmitkerlerdiń esimderin bilmeıtin bolady, dep xabarlaıdy QazAqparat tilshisi.

«Buryn maǵan keletin adamdar ylǵı bireýdiń túıindemesin (rezıýme) tyqpalaı berýshi edi. Endi, ondaı áreketterge jol joq. Nege? Sebebi qazirgi kezde biz mamandardy irikteýdiń biryńǵaı ortalyǵyn qalyptastyryp jatyrmyz. Onyń jumysyna men ózim kirise almaımyn. Oǵan meniń sózim ótpeıdi. Sebebi baǵalaý jumystaryn táýelsiz sarapshylar júrgizedi. Olardyń ózderi úmitkerlerdiń kim ekenin bilmeıtin bolady», - deıdi Bas prokýror.

Onyń aıtýynsha, búginde prokýratýra organdaryna úzdik mamandardy irikteý sharalary da óz nátıjesin bere bastady. «Osynyń bári qazirgi jastarǵa qajet. Olar prokýratýraǵa aǵa-kókesiz de jumysqa turýǵa bolatynyna kóz jetkizýleri kerek. Óıtkeni biz bir saýalnamany ótkizdik. Sonda jastardyń 93 paıyzy prokýratýraǵa qyzmetke turý úshin tanys-tamyrlastar qajet dep jaýap bergen. Joq, olaı emes. Barlyǵy jastardyń ózderine baılanysty. Úmitkerdiń bilimi, kásibı daıyndyǵy, qoǵamdyq pozıtsııasy myqty bolsa, ony eshbir tanyssyz-aq jumysqa alady», - dep atap kórsetti J.Asanov.

Aıta keteıik, búgin Astanada kásibı memlekettik apparatty qalyptastyrý máselelerine arnalǵan jıynda Bas prokýror osy vedomstvonyń jumysyna qolbaılaý bolyp otyrǵan negizgi máseleni atap kórsetti.  Sondaı-aq ol ózin-ózi órtegen adam úshin biliksiz mamandardy kinálap,  jaqynda taǵy úsh prokýrordyń sottalǵanyn jetkizdi.