Buryn isti bolǵan eki túrkistandyq kólik urlap, taǵy ustaldy
KENTAÝ. QazAqparat – Túrkistan oblysynda buryn da isti bolǵan eki turǵyn taǵy kólik urlap ustaldy. Olar kópqabatty turǵyn úılerdiń aýlalarynan 4 kólikti aıdap áketken, dep habarlaıdy QazAqparat tilshisi.
Oblystyq Polıtsııa departamentiniń baspasóz qyzmetinen málim etkendeı, kólik ıeleriniń biri Kentaý APB-niń kezekshi bólimine aryzdanǵan. Ol urylardyń «Nexia» kóligin belgisiz bireýler urlap ketkenin, sóıtip 1,5 mln teńge kóleminde shyǵyn keltirgenin jetkizgen. Buǵan deıin osy tektes aryzdar polıtsııaǵa taǵy úsh turǵynnan túsken. Olar da kólikteriniń aýlada turǵan jerinen qoldy bolǵanyn kórsetken. Osylaısha, 4 jábirlenýshige 6 mıllıonnan astam teńge kóleminde shyǵyn keltirilgeni anyqtaldy.
Tártip saqshylary urylardy ustaý barysynda jaqyn aımaqtardy aralap shyǵyp, kólik bólshekterin satyp alýshylar men satýshylardy teksergen. Qala aýmaǵyndaǵy beınebaqylaý kameralaryn kórip, urylardyń izine túsken. Іzkesýshiler kólik urlanǵan jerlerde túsken qońyraýlardy tekserip, telefon arqyly kúdiktiniń bireýin Kentaý qalasyndaǵy kóshelerdiń birinen ustady. Tergep-tekserý barysynda, onyń sybaılasy Saıramnyń turǵyny ekeni jáne ol seziktimen birge túrmede otyryp shyqqany anyqtaldy. Osylaısha, polıtseıler ekinshi kólik urlaýshyny Saıramdaǵy óz úıinen qolǵa túsirgen.
Tergeý barysynda ustalǵandardyń ekeýi de jasaǵan qylmystaryn tolyq moıyndaǵan. Olar dabylqaqqyshtary joq kólikterdi jymqyryp otyrǵan. Esikterin ashý úshin temir syzǵyshty paıdalanǵan. Urlanǵan mashınalardy Saıram aýdanynda ekinshi kúdiktiniń úıinde bólshektep, satyp júrgeni dáleldendi. Túsken aqshany óz qajettilikterine jaratqan.
«Atalǵan jaıt sotqa deıingi tergep-tekserýdiń biryńǵaı tizilimine engizilip, QR QK-niń 188-baby «Urlyq» boıynsha tirkeldi. Qazirgi tańda eki kúdikti de qamaýda. Tergep-tekserý amaldary júrgizilýde. Qyrkúıek aıynyń sońyna deıin aıyptaý aktisimen is sotqa joldanbaq», - delingen habarlamada.
