Buryn bes ret sottalǵan 44 jasar turǵyn esirtki satyp, ózimen birge taǵy eki adamdy «ala ketti»
ORAL. QazAqparat - BQO qylmystyq ister jónindegi mamandandyrylǵan aýdanaralyq soty esirtki satýmen aınalysqan úsh birdeı turǵynǵa úkim kesti.
BQO sotynyń baspasóz qyzmetinen túsken málimetke qaraǵanda, buryn túrli qylmysy úshin bes ret sottalǵan 44 jasar turǵyn «bul iske» óziniń eki tanysyn (onyń bireýi áıel) tartqan. Olardyń bireýi esirtki tabýmen, ekinshisi sirińke qorabyna salýmen, 34 jasar áıel satýmen aınalysqan. Tergeý organdary áıeldiń birinshide 6 gramm, keıin 3 gramdaı marıhýana satqanyn anyqtaǵan. Endi bireýiniń mekenjaıynan tintý kezinde 1736 gramm marıhýana tabylǵan.
Sot olardy QR QK 259-baby 2-bóligi boıynsha aıypty dep tanyp, uıymdastyrýshyny erekshe tártiptegi kolonııada 8 jyl 2 aıǵa bas bostandyǵynan aıyrdy. Ekinshi sybaılasyna 4, áıelge 6 jyl jaza kesildi. Bular jalpy tártiptegi kolonııada jazasyn óteıtin bolady.
