Býrıatııada jolaýshylar ushaǵy apatqa ushyrady
NUR-SULTAN. QazAqparat - Býrıatııanyń Nıjneangarsk áýejaıyna An-24 jolaýshylar ushaǵy apatty jaǵdaıda qonǵan bette órtengen. Apat saldarynan eki ekıpaj múshesi qaza taýyp, 30-ǵa jýyq jolaýshy zardap shekti, dep habarlaıdy «QazAqparat» HAA.
Býrıatııa úkimetiniń málimdeýinshe, Ýlan-Ýdeden shyqqan «Angara» áýe kompanııasynyń An-24 jolaýshylar ushaǵy beısenbi kúni tańerteń qozǵaltqyshtarynyń biri isten shyǵýyna baılanysty Nıjneangarsk áýejaıyna apatty jaǵdaıda qonǵan.
Qoný kezinde ushaq ushyp-qoný jolaǵynan shyǵyp ketip, tazartý qondyrǵylary ǵımaratyna soqtyǵysyp, artynsha órt shyqqan.
«Angara» áýe kompanııasynyń derekterine qaraǵanda, ushaq bortynda barlyǵy 47 adam bolǵan.
Respýblıka úkimeti apat saldarynan ushqysh Vladımır Kolomın men tehnık Oleg Bardanov mert bolǵandyǵyn málimdep otyr. Olardyń denesin kabınadan qutqarýshylar alyp shyqty.
