Burshaq, naızaǵaı, ekpindi jel: 5 shildede aýa raıy kúrt qubylady
ASTANA. KAZINFORM — 5 shildede «Qazgıdromet» boljamyna sáıkes, el aýmaǵynda aýa raıy turaqsyz bolady.
Respýblıka boıynsha naızaǵaıly jańbyr jaýady, keı jerlerde burshaq pen ekpindi jel kútiledi. Soltústik, shyǵys, ońtústik-shyǵys jáne ortalyq óńirlerde nóser jaýyn bolýy múmkin, al ońtústik-batysta jaýyn-shashynsyz aýa raıy saqtalady. Sondaı-aq el aýmaǵynyń basym bóliginde jel kúsheıedi, al soltústik-batys, shyǵys jáne ońtústik-shyǵys aımaqtarda túngi jáne tańǵy ýaqytta tuman túsýi yqtımal.
Jetisý oblysyndaǵy Alakól kólderi mańynda óte kúshti jel soǵyp, onyń ekpini keı kezde 30 m/s jáne odan da joǵary bolýy múmkin.
Mańǵystaý, Atyraý, Batys Qazaqstan oblystarynda jáne Aqtóbe oblysynyń ońtústik-batysynda kúndiz qatty ystyq kútiledi, aýa temperatýrasy +35…+39°C deıin kóteriledi.
Sonymen qatar birqatar óńirlerde órt qaýpi joǵary jáne óte joǵary deńgeıde bolady. Órt qaýpi joǵary aımaqtarǵa Túrkistan, Atyraý oblysynyń batysy, Pavlodar oblysynyń batysy men ońtústigi, Qaraǵandy oblysynyń soltústigi, Shyǵys Qazaqstan men Qyzylorda oblystarynyń jekelegen aýmaqtary, Jambyl jáne Ulytaý oblystary kiredi. Al keı óńirlerde, sonyń ishinde Jetisý, Abaı, Qyzylorda, Túrkistan, Jambyl, Atyraý, Almaty, Aqmola, Pavlodar, Qaraǵandy jáne Shyǵys Qazaqstan oblystarynyń jekelegen bólikterinde órttiń óte joǵary qaýpi saqtalady.
Búgin elimizdiń birqatar óńirinde jel kúsheıip, tuman túsetinin jazdyq.
