Búrkitshi qyz Túrkistanda murajaı ashyp, jastardy qusbegilik ónerge baýlıdy
ASTANA. KAZINFORM - Álem tanyǵan búrkitshi qyz Túrkistannyń týrızmin damytýǵa óz úlesin qospaq.
Aısholpan Nurǵaıyp óńirde qusbegilik murajaıyn ashyp, jastardy atadan mıras bolyp kele jatqan bekzada ónerge baýlıtyn boldy. 13 jasynda esimi alty qyrdan asqan qazaq qyzynyń bastamasymen tilshimiz tanysyp keldi.
Aısholpannyń atyn áıgilegen — amerıkalyq rejısser Otto Bell túsirgen kınotýyndy. Álemniń 30 elinde kórsetilgen. Osy fılmnen keıin Mońǵolııada dúnıege kelgen búrkitshi qyzdyń ómiri adam tanymastaı ózgerdi. Nıý-Iorkte Aısholpan «Azııanyń batyr qyzy» degen marapatqa ıe boldy.
Aıtýynsha, qusbegilik — qannan daryǵan óner.
— Kishkentaı kezimnen, dúnıege kelgennen bastap, búrkitti kórip óstim, qyzyqtym. Aǵam búrkitshi boldy. Ol kisi áskerge ketken soń búrkitin maǵan qaldyryp ketti. Segiz jasymnan bastap qusbegilikpen aınalystym. Kınom arqyly álemniń 32 memleketinde boldym. Sol jerde kınomdy kórsettim. Qazaq eline kelgende basqasha sezim bıledi. Qatty qýanyshtan, qobaljýdan jyladym. Óıtkeni, Otanymyzdy kórip, saǵynyshymdy kishkene bolsa da bastym, — deıdi Aısholpan Nurǵaıyp.
Álemge tanymal qusbegi qyz ótken jyly atajurty — Qazaqstanǵa otbasymen qonys aýdarǵan.
Sheteldiń úzdik ýnıversıtetteri grant usynyp, shaqyrsa da, búrkitshi qyz otandyq ýnıversıtetti tańdapty. Sóıtip, «qazaq tili men ádebıeti» mamandyǵy boıynsha bilim alǵan.
Qazir qusbegilikpen qatar, ustazdyq qyzmetti de qatar alyp júr.
— Aısholpannyń ereksheligi — onyń jany tap-taza. Men oılaımyn, tabıǵatpen etene júrgen adam ǵoı. Tabıǵat eshqashan da jalǵan sóılemeıdi. Tabıǵat — tazalyq. Taýda júrgen adam bıik bolady. Aısholpannyń basqa qyzdardan aıyrmashylǵy osy — tap-taza, móp-móldir tabıǵattyń ózi sııaqty, — deıdi qusbeginiń ustazy Baıan Kerimbekova.
Aısholpan ulttyq bolmysymyzben bite qaınasqan qundylyqtardy damytý armanym edi deıdi. Túrkistanǵa kelý sebebi de osy.
Qazir ol etnoaýyl kesheninde arnaıy mýzeı ashyp, qusbegilik ónerdi dáriptemek.
Mýzeıden bólek, munda ulttyq kıim kıip, atqa, túıege minip, búrkitti qolǵa alyp, tazyny ertip, sýretke túsýge bolady.
Aıta keteıik, Túrkistan oblysynda etnos ókilderi ulttyq ónerdi ulyqtady.