Búrkit baptaıtyn órt sóndirýshi: Qusbegilik arǵy atamnan darydy

ÓSKEMEN. KAZINFORM — Shyǵys Qazaqstan oblysy Glýbokoe aýdanyndaǵy órt sóndirý bóliminde jumys isteıtin Darhan Abzalov qarbalas jumystan qoly qalt etken áredikte qusbegilikti janyna medeý etedi.

бүркітші
Фото кейіпкердің жеке мұрағатынан

«Qarshadaıdan atpen serýendegendi unatamyn»

Darhan Abzalov Glýbokoe aýdany Altaı kentindegi № 21 órt sóndirý bóliminde qaraýyl bastyǵy bolyp qyzmet etedi. Jumysy aýyr ári qaýyrt.

Sonda da súıikti isine ýaqyt tabýǵa tyrysady. Al onyń súıikti isi — búrkit baptaý.

— Týǵan jerim — Tarbaǵataı aýdany Tasbastaý aýyly. Baldaı balalyǵym, bozbalalyq shaǵym sonda ótti. Qarshadaıdan atpen serýendegendi unatamyn. Odan soń ańshy ıtpen taý-tasty kezip, ań aýlaǵandy erekshe jaqsy kóretinmin, — deıdi Darhan.

qutqarýshy
Foto keıipkerdiń jeke muraǵatynan

Keıipkerimiz 2009 jyldan beri tótenshe jaǵdaılar qyzmetinde jumys istep keledi. Talaı iri órtti aýyzdyqtaýǵa qatysqan.

— Ózgege kómekke kelip, qolushyn sozý degen naǵyz baqyt dep esepteımin. «Qarǵys alma, alǵys al» demekshi, kómegimiz tıgender rızashylyǵyn bildirip jatqanda shabyttana túsesiń. Sondyqtan basqa jumysqa aýysqym da kelmeıdi, — deıdi ol.

Qazaqtyń kóneden kele jatqan óneri

Darhan jumystan tys ýaqytyn qanatty serikterimen ótkizýge áýes. Sonyń biri — Qandyqóz. Sol búrkitimen óńirdiń taý jotalaryn kezip, ań aýlaýǵa shyǵady.

— Jalpy qusbegilik maǵan áıgili ańshy bolǵan arǵy atamnan daryǵan. Biraq naqty qolǵa alyp, búrkit ustaı bastaǵanyma 3 jyldan asty. Qus baptaǵanda basqany umytyp, bar ynta-shyntam soǵan baǵyttalady. Bul qazaqtyń kóneden kele jatqan óneri ǵoı. Ony ary qaraı jalǵastyrý bizge mindet dep sanaımyn, — deıdi Darhan Abzalov.

a
Foto keıipkerdiń jeke muraǵatynan

Jaqynda onyń Túrkistanda uıymdastyrylǵan búrkitshiler chempıonatyna qatysyp qaıtqany bar.

Sondaı-aq Soltústik Qazaqstan oblysynda ótken Qazaqstan Respýblıkasynyń VIII chempıonatynda da óz sheberligin kórsetti.

— Petropavl qalasynda jaqsy nátıje kórsettik deýge bolady. Biraq sál kedergiler bolyp, júlderi orynǵa ilige almaı qaldyq. Dese de bolashaqta jeńimpazdar qatarynda kórinemiz dep senemin. Sońǵy jyldary Qazaqstanda qusbegilikke degen qyzyǵýshylyq artyp keledi. Qusbegiler tek qyrandardy baptap, kásibı ańshylyqqa úıretip qana qoımaı, ulttyq ónerdi nasıhattaıdy. Osyndaı jarystardyń arqasynda qusbegilikke qyzyǵatyndar sany kóbeıe túsedi. Sondyqtan jıi uıymdastyrylyp turǵany quba-qup, — deıdi Darhan.

Glýbokoe aýdanynda Naýryz meıramyna oraı ortalyq alańda jáne basqa da eldi mekenderde túrli sharalar qolǵa alynyp jatyr.

Solarǵa órt sóndirýshi ári qusbegi Darhandy shaqyryp jatqandar kóp.

— Naýryzǵa oraı túrli usynystar, shaqyrtýlar túsip jatyr. Biraq oǵan bizdiń qarbalas qyzmet mursha bere bermeıdi. Dese de bólimge ulttyq kıim kıip, búrkitimdi ustap baramyn dep josparlap otyrmyn, — deıdi keıipkerimiz.

a
Foto keıipkerdiń jeke muraǵatynan

Sóz sońynda ol barsha qazaqstandyqty Naýryz meıramymen quttyqtady.

— Áz Naýryz ár shaqyraqqa qut-bereke, baqyt, qýanysh ákelsin. Elimiz damyp, órkendeı bersin. Otandastarymyz bıikterdi baǵyndyryp, el abyroıyn asqaqtatsyn. Ár úıde balaqaılardyń shat kúlkisi tyıylmasyn. Ulys oń, aq mol bolsyn! , — deıdi Darhan Abzalov.

Eske salsaq, buǵan deıin ShQO Kúrshim aýdanynda turatyn Raıhan Nurǵazınovanyń tushpara men mantyny jasaýdy kásipke aınaldyryp, aýylda shaǵyn tseh ashqany jaıly jazǵanbyz.  

búrkitshi
Foto keıipkerdiń jeke muraǵatynan

 

Сейчас читают