Búrkit, asyq, ulttyq bı: Elshiler Naýryzdy qalaı toılady
ASTANA. KAZINFORM – Astanada elshiler jáne shetel ókilderiniń qatysýymen Naýryz baly ótti.
Astana Opera teatrynda túrli memleketterdiń ókilderi Naýryz meıramyn toılady. Dýmanǵa kelgen qaýym qazaqı taǵamdardan dám tatyp qana qoımaı, asyq oınap, arqan tartysty, qazaqsha kúreste kúsh synasyp, ulttyq án-kúıdi tamashalady.
Teatrdyń ishi ulttyq naqyshta bezendirilipti. Kıiz úıdiń shaǵyn maketterinde kıiz basý mashyqtaryn úırenip, ulttyq kıimmen búrkit ustap sýretke túsýge, asyq oınap, kúreste kúsh synaýǵa múmkindik jasalǵan. Majarstannyń Qazaqstandaǵy Tótenshe jáne Ókiletti Elshisiniń jubaıy ásirese arqan tartys saıysy unaǵanyn aıtady.
«Qazaqstanda turyp jatqanymyzǵa eki jyl boldy. Osy ýaqyttyń ishinde Naýryzdyń mánin túsinip úlgerdik. Mal asyǵynyń oıyn quralyna aınalǵanyna tańǵaldym. Búgingi arqan tartysta bizdiń komanda jeńiske jetti. Ol oıyn da maǵan aıryqsha unady. Óıtkeni bul saıys Majarstanda da bar. Qazaq ashanasynan asylǵan et pen baýyrsaq, jent pen irimshik qatty unaıdy. Majarstanǵa barǵan saıyn jylqynyń súr etin, irimshik ala baryp, jaqyndarymyzǵa dám tatqyzamyz», - deıdi dıplomattyń jary.
Al Ispanııanyń Qazaqstandaǵy Tótenshe jáne Ókiletti Elshisi Alberto Anton Kortes ulttyq orkestrmen birge kúı shertip, óz qabiletin synap kórdi.
«Qazaqtyń ulttyq kıimi men án-kúıi degen keremet álem. 8 jasymda akkordeon tartyp úırengenmin. Sol mashyǵym dıplomattardyń orkestrine múshe bolýǵa múmkindik berdi. Alǵan áserim erekshe», - deıdi Elshi.
Saıahatshy bloger Iovana Kvrzıch dıplomattarmen birge «Qamajaı» bılep, merekeniń kórkin ashty.
«Qazaqtyń ulttyq bıleri ózge halyqtardikinen erekshe. Ulttyq kıimderińiz de óz aldyna bólek álem. Boıaýy de, oıý-órnegi de erekshe energetıka beredi», - deıdi bloger.
Ulybrıtanııanyń Qazaqstandaǵy Tótenshe jáne Ókiletti Elshisi Ketı Lıch qazaqtyń ulttyq taǵamdary Naýryzdyń mazmunyn mándi etip turǵanyn atap ótti.
«Naýryz kezinde qazaqtyń ulttyq taǵamdary mol usynylatyny qatty unaıdy. Naýryz kóktemniń basy ǵana emes, otbasyńmen bas qosyp, dostaryńmen qaýyshatyny erekshe jyly meıram», - deıdi ol.
Naýryz balda qazaqtan basqa halyqtardyń ulttyq kıimderi de nasıhattaldy. Mysaly, Rýmynııanyń Qazaqstandaǵy Tótenshe jáne Ókiletti Elshisi Madalına Lýpý óz halqynyń ulttyq kóılegin kıip kelipti.
Dýmanshyl toptyń ishinde Mádenıet jáne aqparat mınıstri Aıda Balaeva da boldy. Onyń aıtýynsha, Qurmanǵazy atyndaǵy Qazaq Memlekettik Akademııalyq ulttyq aspaptar orkestri oryndaǵan kúıler Naýryzdyń qurmetine oraı 25 memlekettiń radıostansasynan shyrqalyp jatyr.
