«Búrkit» arnaıy jasaǵynda tarıhı jańalyq: alǵash ret qyz jaýynger qabyldandy
ASTANA. KAZINFORM — Qazaqstannyń Ulttyq ulanyna qarasty «Búrkit» arnaıy jasaǵynyń tarıhynda alǵash ret áıel áskerı qyzmetshi sapqa qosyldy. «Kıtana» laqap atymen tanylǵan Qymbat — halyqaralyq jarystardyń jeńimpazy, endigi maqsaty — kúreń beret alý.
Qymbattyń «Búrkit» jasaǵyna kelýi Dýbaıda ótken SWAT Challenge halyqaralyq jarysymen baılanysty. Ol bul dodada Qazaqstan atynan óner kórsetken «Tomırıs» qyzdar komandasynyń quramynda baq synady. Áıelder arasyndaǵy sanatta qazaqstandyq komanda qarsylastarynan ozyp, birinshi oryndy ıelendi. Al jalpy komandalyq esepte 18-orynǵa turaqtap, birqatar erler quramalarynan joǵary nátıje kórsetti.
Jarys barysynda mergendigimen kózge túsken Kıtanaǵa «Búrkit» arnaıy jasaǵy usynys tastaıdy. Ol kóp oılanbastan kelisim berip, osylaısha bólimshe tarıhyndaǵy alǵashqy qyz áskerı qyzmetshi atandy.
Qymbattyń sporttaǵy jetistikteri de az emes. Ol — qoıan-qoltyq urystan alty dúrkin Qazaqstan chempıony, álem chempıonatynyń kúmis jáne eki qola júldegeri, álem kýbogy, Eýropa jáne Azııa chempıonattarynyń kúmis júldegeri.
Djıý-djıtsýdan úsh dúrkin álem, Azııa chempıony jáne eki dúrkin Eýropa chempıony atanǵan. MMA boıynsha Qazaqstan jáne Azııa chempıony, jaýyngerlik sambodan el chempıony ári álem chempıonatynyń qola júldegeri.
Budan bólek, Dúnıejúzilik polıtsııa oıyndarynda dzıýdodan altyn, djıý-djıtsýdan kúmis medal jeńip alǵan. Qoıan-qoltyq urys, djıý-djıtsýdan halyqaralyq dárejedegi sport sheberi, sambo men MMA-dan sport sheberi.
Qazir Qymbattyń alǵa qoıǵan basty maqsaty — kúreń beret synaǵynan súrinbeı ótý. Bul synaq jaýyngerdiń dene daıyndyǵyn, tózimdiligi men rýhynyń beriktigin talap etedi. Maqsatyna jetse, ol Ulttyq ulan tarıhynda kúreń beretke qol jetkizgen alǵashqy qyz jaýynger atanbaq.
