«Búrkit» arnaıy jasaǵy Jańaózende esirtki saýdasymen aınalysqan adamdy ustady

AQTAÝ. KAZINFORM – 16 aqpanda Mańǵystaý oblystyq polıtsııa departamentiniń málimetinshe, 7 aqpan kúni saǵat shamamen 18:10-da esirtkige qarsy kúres basqarmasynyń qyzmetkerleri kınologııalyq ortalyq pen «Búrkit» arnaıy jasaǵynyń qoldaýymen, sondaı-aq óńir prokýratýrasynyń úılestirýimen jedel-izdestirý jumysyn ótkizdi. Іs-shara barysynda Kıra atty qyzmettik ıt paıdalanyldy.

– Zańsyz esirtki aınalymyna qatysy bar azamat ustaldy. Tekserý barysynda onyń qolynan «apıyn» esirtkisi salynǵan 4 oram tabyldy. Sondaı-aq turǵylyqty jerin tintý kezinde taǵy 5 oram apıyn, elektrondy tarazy, spýtnıktik baılanys quraly, GPS qurylǵysy, dalalyq kózildirik (bınokl) jáne úlken kólemdegi aqsha tabyldy. Saraptama qorytyndysyna sáıkes, zańsyz aınalymnan tárkilengen opııdiń jalpy salmaǵy 273,14 grammdy qurady, - delingen habarlamada. 

Medıtsınalyq kýálandyrý barysynda ustalǵan adamnyń esirtki qoldanǵany rastaldy. Oǵan qatysty Qazaqstan Respýblıkasy Ákimshilik quqyq buzýshylyq kodeksiniń 440-1-baby (esirtki, psıhotropty zattar, olardyń analogtary jáne kúshti áser etetin zattardy medıtsınaǵa jatpaı tutyný) boıynsha ákimshilik hattama toltyryldy.

Osy oqıǵa boıynsha Qazaqstan Respýblıkasy Qylmystyq kodeksiniń 297-babynyń 2-bóligi (úlken mólsherde nemese satý maqsatynda esirtki zattaryn zańsyz saqtaý) boıynsha tergeý jumystary bastaldy.

Kúdikti ýaqytsha ustaý ızolıatoryna qamaldy. Qazirgi ýaqytta qajetti tergeý sharalary júrgizilip jatyr. 

Buǵan deıin, Tájik-aýǵan shekarasynda iri kólemdegi esirtki partııasy toqtatylǵan bolatyn.