Búrkitterdiń joıylyp ketý qaýpin zańnamalyq retteý qajet - Ulttyq sport túrleri qaýymdastyǵy
ASTANA. QazAqparat - QR Ulttyq sport túrleri qaýymdastyǵynyń prezıdenti Bekbolat Tileýhan Halyqaralyq búrkitshiler qaýymdastyǵynyń (IAF) prezıdenti Adrıano Lombardpen kezdesti. Basqosýda Qazaqstandaǵy qusbegilik óneriniń qazirgi jaǵdaıy men ózekti máseleleri talqylandy.
Kezdesýge Ulttyq sport túrleri qaýymdastyǵynyń vıtse-prezıdenti Dáýren Ábdihamıtov, Halyqaralyq Búrkitshiler qaýymdastyǵynyń (IAF) vıtse-prezıdenti Baqyt Qarmaqbaev pen «Búrkitshi» federatsııasynyń atqarýshy dırektory V.Zemblevskıı qatysty.
Bul jıynda elimizdegi qyran qustardyń jaı-kúıi, olardyń zań júzinde qanshalyqty qorǵalǵany tárizdi túıtkildi máselerdiń túıini tarqatyldy. Mamandardyń aıtýynsha, elimizden arab elderine qustardy zańsyz áketken brakonerlik áreketter kóptep kezdesedi. «Búrkit - álemde óte sırek kezdesetin qus. Sondyqtan olardyń joıylyp ketý qaýipin zańnamalyq turǵyda rettegenimiz abzal», - deıdi B.Tileýhan. Qaýymdastyqqa tabıǵatty qorǵaý boıynsha memlekettik qurylymdary men zoologııalyq ınstıtýttarmen birlesip jumys atqarý boıynsha mindetter júkteldi. Osy máselege baılanysty taraptar bıyl qazan aıyna Almaty qalasynda halyqaralyq konferentsııa uıymdastyrýǵa kelisti. Uıymdastyrýshylar onda sheteldik qusbegiler, ǵalymdar jáne mamandarmen birge álemdegi eń ozyq tájirıbeler men qustardy qorǵaýdyń zańnamalyq úlgisin daıyndaýǵa jáne basqa da kóptegen suraqtardyń basyn ashatynyna senimdi.
Mártebeli meıman QR Ulttyq sport túrleri qaýymdastyǵy prezıdentiniń Astanaǵa arnaıy shaqyrtýymen kelgen. Adrıano Lombardtyń bul Ortalyq Azııaǵa alǵashqy sapary eken.
Kezdesý sońynda qaýymdastyqtyń qurmetti qonaǵy qusbegilik ónerdiń elimizdiń aýmaǵynan, ıaǵnı bizdiń ata-babalarymyzdan taraǵanyn jetkizdi. Sondaı-aq eki tarap qusbegilik ónerdiń nasıhattalýynda tize qosa jumys atqarýǵa ýaǵdalasty, dep habarlaıdy QR Ulttyq sport túrleri qaýymdastyǵynan.
