Búrkitshiler merekesine álemge áıgili Aısholpan qatysty
ASTANA. QazAqparat - Mońǵolııa astanasy Ulanbatyr qalasynyń mańynda ornalasqan «Chıngısıın hýree» týrıstik bazasynda jyl saıynǵy «Kóktemgi altyn qyran» festıvali ótýde, dep habarlaıdy «QazAqparat» HAA MONTsAME-ge silteme jasap.
Aıta ketken jón, 1999 jyldan beri uıymdastyrylatyn bul mereke týrıster eń kóp keletin qysqy dýmanǵa aınalǵan. 6 myń jyldyq tarıhy bar búrkitshiler saıysyn qyzyqtaýshylar sany jyl saıyn kóbeıip keledi.
XIII ǵasyr stılinde turǵyzylǵan «Chıngısıın hýree» týrıstik keshenine bıyl Baıan-Ólgeı aımaǵynan 20 búrkitshi keldi. 1800 shaqyrym qashyqtyqtan jetken búrkitshilerdiń eń úlkeni 88 jastaǵy Báıteı Babıuly bolsa, olardyń arasynda álemge áıgili búrkitshi qyz Aısholpan da bar.
Eki kúnge sozylǵan merekede qus salýshylar óz sheberlikterin synǵa saldy. Sonymen qatar kókpar oıyny da týrıster nazaryna usynyldy.
Festıval qonaqtary ulttyq oıyndarǵa qatysyp, jergilikti halyqtyń dastarhanynan dám tatty. Qazaq qyzdarynyń kıim tigý, kesteleý ónerin tamashalady.
Esterińizge sala keteıik, 2016 jyly ıÝNESKO álemdegi 60 elde qus salyp ań aýlaý dástúrin reprezentatıvtik tizimge engizgen bolatyn.
