Búrkitshi qyz týraly fılm «Oskarǵa» usynylmaq

Eki jylǵa sozylǵan jumys aıaqtalyp, Otto Bell «Búrkitshi qyz» (The Eagle Huntress) derekti fılmin qazan aıynda kópshiliktiń nazaryna usyndy. Fılm Nıý-Iork pen Los-Andjeles kınoteatrlarynda 28 qazannan kórsetile bastady. Bir jarym saǵattyq týyn­dy aǵylshynsha jáne keıip­kerlerdiń sózi sýbtıtrlermen berilgen.

Búrkitpen ań aýlaý er adamnyń isi sanalatyny jaıly estigen fılm avtorlary aýyl aqsaqaldaryna baryp, bul jaıdyń mánin suraǵan. Sonymen qatar, Otto Bell dástúrdi bil­meıtin kórermen durys túsin­beı qalýy múmkin degen oımen ańshylyqtyń keı kórinisterin qysqartqanyn aıtqan.

Fılmniń prodıýseri ári dybystaýshysy «Juldyzdy soǵys» («Zvezdnye voıny») aktrısasy Deızı Rıdlı boldy. Otto Bell Business Insider portalyna bergen suhbatynda Rıdlıdiń Aısholpannyń oqı­ǵasyna erekshe tolqyǵanyn aıtqan. Deadline basylymyna bergen suhbatta Deızı ózi de: «Aısholpannyń oqıǵasy maǵan erekshe áser etti. Sondyqtan osy fılmniń bir qatysýshysy bolǵym keldi. Jobaǵa qatysqanymdy maqtan etemin», - dedi.

Fılmdi Latyn Amerıkasy, Jańa Zelandııa, Germanııa, Aýs­tralııa men Azııada kórsetý qu­qyǵy Sony kompanııasyna tıesili. 20th Century Fox Animation kartınaǵa remeık túsirý týraly kelisózder júr­gizip jatyr. Biraq bul ıdeıany júzege asyrý úshin Sony Pictures kompanııasynyń kelisimi kerek. Ekeýi básekeles bolǵandyqtan, ázirge bolashaǵy belgisiz. Derekti fılm negizinde anımatsııalyq fılm jasaý quqyǵy 2 mıllıon dollarǵa baǵalanyp otyr. Bul quqyq aıasyna, sondaı-aq, álemniń birqatar elderine taratý múmkindigi de kiredi.

Aısholpan qazir Baıan-Ólgıı qalasyndaǵy Mońǵol-Túrik kol­ledjinde 10-synypta oqıdy.

1 qarasha kúni «Qazaqstandyq búrkitshi qyz» dep maqala jarııalaǵan «New York Times» eki kúnnen keıin qateleskenderin jazyp, Mońǵolııada turatyn qazaq qyzy ekenin aıtyp, túzetý jarııalady. Fılm týraly basqa da álemdik BAQ jazyp jatyr. Keıbiri Aısholpandy «ǵasyrlar dástúrin boıyna sińirgen arý» atady.

Aısholpandy uıań, názik ári batyr qyz degen North West Herald amerıkalyq basylymy «Bul fılm kórermendi Aısholpannyń álemine aparady. Aısholpan óskende dáriger bolýdy armandaıdy. Biraq búrkit­shilikti tastaǵysy kelmeıdi. «Búrkit­shi qyz» jastarǵa shabyt beretin, áserli peızajymen júrekterge jylý beretin fılm» dep jazdy.

Daily News «Mońǵolııanyń batysyndaǵy Altaı taýlarynda túsirilgen fılm búrkitpen saıatshylyq jasaý dástúrin kórsetedi. Bul - kóshpendi qazaq­tardyń urpaqtan urpaqqa mura etip kele jatqan óneri. Aısholpan - osy dástúrdi meńgergen erekshe qyz» dep jazdy.

Aıta keteıik, Otto Bell «Búrkitshi qyzdy» «Oskarǵa» usynǵaly otyr, dep jazady «Egemen Qazaqstan» basylymy.