Búrkitshi qyz Aısholpan Qazaqstan azamattyǵyn ala ma?
ASTANA. QazAqparat - 2014 jyly aǵylshynnyń Daily Mail basylymynda «Qazaqtyń salt-dástúrindegi asyl qundylyqtardyń biri - qusbegilik ónerin ıgergen on úsh jasar jalǵyz qyz» degen taqyryppen maqala jarııalanǵan bolatyn. Onda Mońǵolııada turatyn Aısholpan (Ashol Pan) esimdi 13 jastaǵy qyz álemdegi eń jas qusbegi ekendigi aıtylǵan. Osy jarııalanymnan soń Aısholpannyń esimi álemge tarady.
Al ataqty amerıkalyq rejısser Otto Bell osy Aısholpan týraly «Búrkitshi qyz» (The Eagle Huntress) derekti fılmin 2016 jyldyń qazan aıynda kópshiliktiń nazaryna usynǵan edi.
Aısholpandy qusbegilikke baýlyǵan- ákesi Nurǵaıyp. Taıaýda Mońǵolııanyń ulttyq arnalarynyń birinde onyń suhbaty shyqty.
Asiarussia.ru habarlaǵandaı, Aısholpannyń otbasy Baıan-Ólgıı aımaǵynyń Tsambagarav taýy mańynda turady, ata kásibi - mal sharýashylyǵymen aınalysady eken.
Aısholpannyń ákesiniń aıtýynsha, onyń otbasyn Qazaqstanǵa shaqyrǵan kórinedi.
«Biz Mońǵolııa óńirinde týylsaq ta, qazaqpyz. Dese de bizdiń ata-bababyz osy óńirde týyp-ósti. Sondyqtan da men osy jerde týǵanymdy maqtan tutamyn. Bizdi Qazaqstan azamattyǵyn alýǵa shaqyrǵan. Alaıda bizdi ol qyzyqtyrmaıdy. Sebebi meniń týǵan jerim - Mońǵolııa», - deıdi Nurǵaıyp suhbat barysynda.
Aıta keteıik, amerıkalyq kınoakademııa «Búrkitshi qyz» fılmin «Oskar» syılyǵyna úmitkerlerdiń qataryna qosty . Al tanymal ánshi Sia mońǵolııalyq búrkitshi qazaq qyzy Aısholpan Nurǵaıyp týraly fılmniń saýndtregi «Angel by the Wings» atty jańa án jazdy.
