Búrkitshi Aısholpan týraly jańa fılm kórermenderge jol tartty

ASTANA. QazAqparat - Qazaqtyń saıatshylyq ónerin álemge tanytýǵa óz úlesin qosqan Mońǵolııadaǵy qandasymyz Aısholpan Nurǵaıypqyzynyń qatysýymen túsirilgen «Kóshpendiler» derekti fılminiń «Mońǵolııa qazaqtary: Búrkitshiler» serııasy YouTube jelisine shyqty, dep habarlaıdy QazAqparat tilshisi.

«Mońǵolııa qazaqtary: Búrkitshiler» fılmi Youtube vıdeohostıngine jarııalandy. Basty rólde ataqty búrkitshi, mońǵolııalyq qandasymyz Aısholpan Nurǵaıypqyzy. Fılmde tek Aısholpan týraly ǵana emes, odan bólek mońǵolııalyq qazaqtar jáne olardyń turmysy men búrkitshilik kásibi týraly baıandalady. Búrkitshi Aısholpan amerıkalyq rejısser Otto Bellanyń - «Eagle Huntress» fılmine túsirilýiniń arqasynda AQSh jáne Eýropaǵa tanymal boldy» , - dep jazdy «Mońǵolııa qazaqtary: Búrkitshiler» fılminiń qoıýshy rejısseri Qanat Beısekeev Feısbýktegi paraqshasynda.

Aıta ketsek, 2016 jyly Aısholpan týraly «Búrkitshi qyz» (Eagle Huntress) derekti fılmi jaryqqa shyqqannan soń, jas búrkitshi jaıly álemniń BBC, New York Times jáne CNN sekildi mańdaıaldy BAQ birinen soń biri jarysa jazǵan bolatyn.

Eske salsaq, ústimizdegi jyldyń qyrkúıek aıynda mońǵolııalyq qandasymyz Qazaqstanǵa arnaıy kelgen edi. Onda ol elimizdiń atynan jarystarǵa qatysýǵa daıyn ekenin málim etti. 

Odan bólek, atalǵan fılmniń «Qazaqstan» RTRK tapsyrysymen túsirilgennin jáne onyń basqarma tóraǵasy Erlan Qarınniń aıtýynsha, atalǵan jobanyń negizgi maqsaty - shetelge qonys aýdarǵan qandastarymyzdyń ómiri men turmys-saltyn kópshilikke kórsetý ekendigi týraly jazǵan bolatynbyz.