Búrkitbaı Aıaǵan: Qazaqstandaǵy prezıdenttik ınstıtýt óziniń tıimdiligin kórsetti
«Qazaqstan Parlamenti 1990 jyly Qazaqstan Respýblıkasynyń Prezıdenti laýazymyn bekitip, birden-bir sheshim qabyldady. Prezıdenttiktiń 30 jyldyq tarıhy sol kezdegi tańdaýdyń durystyǵyn kórsetip otyr. Aýqymdy saıası reformalar júzege asyrylyp, eldiń jańa astanasy boı kóterdi. Ekonomıkalyq reformalar jemisin berip, ulttyq valıýtany qoldanysqa engizdik. Ulttyq qaýipsizdik júıesi jolǵa qoıylyp, shekara shegendeldi. Qazaqstan ıadrolyq qarýdan bas tartqan memleket atandy. Osylaısha Qazaqstandaǵy prezıdenttik ınstıtýt óziniń tıimdiligin kórsete bildi», - dedi Búrkitbaı Aıaǵan «Prezıdenttik basqarý nysany. Konstıtýtsııalyq negiz jáne saıası tájirıbe» atty halyqaralyq onlaın-konferentsııada.
Memleket tarıhy ınstıtýtynyń dırektory óz sózinde halyqaralyq konferentsııaǵa qatysýshylar Qazaqstandaǵy prezıdenttik basqarý júıesiniń engizilgenin – durys sheshim ekenin aıtyp jatqanyn atap ótti.
«Sheshimderdiń kóbin qabyldaý áste ońaıǵa túsken joq. Josparlanǵan sharalardyń bári de iske asa qaldy deýge taǵy kelmeıdi. Áıtse de qazir biz halyqaralyq dárejede abyroıy bar Qazaqstanǵa ıe bolyp otyrmyz. Qazaqstan – Birikken Ulttan uıymynyń múshesi. Búgingi pandemııany álem de, Qazaqstan da eńseretinine kúmánim joq», - dep túıdi Búrkitbaı Aıaǵan.