«Búrkit» dramasy Mońǵolııada kórermenge jol tartty - Sheteldegi qazaq BAQ-qa sholý
Qazaqstanǵa baratyn «Shandýn nómirli» Qytaı-Eýropa poıyzy alǵash ret jolǵa shyqty- «Halyq gazeti»
Qazaqstanǵa baratyn «Shandýn nómirli» Qytaı-Eýropa poıyzy alǵash ret jolǵa shyqty. 15 qarasha kúni Tszıbo Hýantaı – Qazaqstan Almaty baǵytyndaǵy «Shandýn nómirli» Qytaı-Eýropa poıyzy Tszıbo arnaıy jelisinen jolǵa sátti shyqty, dep habarlaıdy Qytaıdyń «Halyq gazeti» aqparattyq portaly.
Atalǵan BAQ-tyń málimetinshe, alǵashqy poıyzǵa Hýantaıda jáne oǵan jaqyn aýdandarda óndirilgen quny shamamen 6 mıllıon ıýanǵa jýyq 50 vagon kólik dońǵalaqtaryn, bolat sharlardy, hımııalyq ónimderdi, turmysqa qajetti zattardy jáne keramıkalyq buıymdardy jóneltti. Poıyz Shyńjańdaǵy Qorǵas shekarasy arqyly elden shyǵyp, Qazaqstannyń Almaty qalasyna barady. Tasymaldaý ýaqyty shamamen 7 kúnge sozylady.
Sonydaı-aq, osy aptada «Halyq» gazetinde «Qazaqstan Qytaıǵa balyq ónimderiniń eksportyn ulǵaıtady» degen taqyryptaǵy aqparat jaryq kórdi.
Qytaılyq basylymnyń keltirgen deregine súıensek, Qazaqstannyń Ekologııa, geologııa jáne tabıǵı resýrstar mınıstri Serikqalı Brekeshev qarashanyń 14 kúngi parlamenttik Úkimet otyrysynda Qazaqstan Qytaıǵa balyq ónimderiniń eksportyn ulǵaıtatynyn málimdedi.
Ol Qazaqstan ónimderiniń Qytaıǵa eksporttalýyna erekshe mán beretinin aıtqan.
Mınıstr eksporttyq naryqty keńeıtý maqsatynda Qazaqstan men Qytaı veterınarııalyq sertıfıkat týraly kelisimge kelgenin málimdegen.
«Qazaqstannyń tabıǵı sýlarynda jyl saıynǵy balyq aýlaý kólemi shamamen 40 000-45 000 tonnany qurap, bul derekter jyldan jylǵa artyp keledi. Qazaqstan jyl saıyn 25 000 tonna balyq pen sý ónimderin eksporttaıdy. Olardyń kópshiligi óńdelgen ónimder. Bular ishki jáne halyqaralyq naryqta belgili bir básekege qabilettilikke ıe», dep jazady qytaılyq BAQ.
Samarqandta «Eýropalyq Odaq – Ortalyq Azııa» mınıstrleriniń kezdesýi ótti- «ÓzA»
Samarqand qalasynda «Eýropa Odaǵy – Ortalyq Azııa» formatynda mınıstrler kezdesýi ótti.Syrtqy ister mınıstrliginiń habarlaýynsha, Eýropalyq Odaq pen Ortalyq Azııa elderiniń syrtqy saıası vedomstvolarynyń basshylary men ókilderi eki aımaq arasyndaǵy saıası-dıplomatııalyq, saýda-ekonomıkalyq, ınvestıtsııalyq sý-energetıka, ekologııalyq jáne mádenı-mádenı salalardaǵy ekijaqty qarym-qatynastardyń qazirgi jaǵdaıy men damý perspektıvalaryn talqylady, dep habarlaıdy ózbekstandyq «ÓzA» aqparattyq agenttigi.
Atalǵan basylymnyń málimetinshe, sharanyń ashylý saltanatynda Ózbekstan Respýblıkasynyń Syrtqy ister mınıstri Vladımır Norov bul konferentsııany Samarqandta ótkizý týraly sheshim Ortalyq Azııanyń, atap aıtqanda Samarqand qalasynyń aımaqaralyq qatynastardaǵy jańa «hab» retinde geosaıası mańyzdylyǵynyń artyp kele jatqanyn kórsetetinin atap ótti.
«Mınıstrlerdiń Samarqandtaǵy kezdesýi óńiraralyq dıalogtyń jańa kún tártibin ázirleýge jáne uzaq merzimdi perspektıvada tıimdi yntymaqtastyqtyń naqty baǵyttaryn anyqtaýǵa múmkindik beretinine senim bildirdi», dep jazady «ÓzA».
Qandasymyz Aınagúl Aıyphanqyzy álemdik IWEC-2022 syılyǵyna ıe boldy –Kaznews
Ispanııanyń Madrıd qalasynda 15-shi IWEC (The International Women’s Entrepreneurial Challenge Foundation) Áıelder kásipkerligi jóninde konferentsııasy ótýde, dep habarlaıdy «Kaznews» aqparattyq agenttigi.
Konferentsııaǵa álemniń 50 elinen 150 ge jýyq kásipker áıelder qatysýda. Atalmysh sharaǵa Baıan-Ólgıı aımaǵynan «Pakkale» kompanııasynyń dırektory Aınagúl Aıyphanqyzy, «Best» saýda ortalyǵynyń dırektory Lashyn Sahabaqyzy, «Baıan-Medıana» kompanııasynyń dırektory Rıza Mızanbaıqyzy qatarly kásipkerler qatysýda.
Mońǵolııalyq BAQ-tyń keltirgen málimetine súıensek, bul konferentsııa aıasynda «2022 IWEC» syılyǵymen Aınagúl Aıyphanqyzy marapattaldy.
Astana-Tehran qarym-qatynasynyń kókjıegi aıqyn - Parstoday
Qazaqstannyń Iran Islam respýblıkasyndaǵy Elshisi Astana-Tehran qarym-qatynasynyń bolashaq kókjıegin jarqyn dep atady. Bul týraly osy aptada Irannyń Parstoday aqparat agenttigi habarlady. Irandyq basylymnyń málimeti boıynsha, Ashat Orazbaı 20 qarashada ótetin eldiń prezıdenttik saılaýyna qatysty maqalasynda eki eldiń bolashaq qarym-qatynasy týraly pikirin bildirgen.
«Qazaqstan men Iran Islam Respýblıkasy salǵan berik negizdi eskere otyryp, eki el arasyndaǵy qarym-qatynastardyń bolashaǵyna optımıstik kózqaraspen qaraýǵa kóptegen sebepter bar. Iran men Qazaqstan arasyndaǵy 2022 jyldyń qańtar-tamyz aralyǵyndaǵy saýda kólemi ótken jyldyń sáıkes kezeńimen salystyrǵanda 9,3 paıyzǵa artyp, 350,2 mıllıon dollarǵa jetti», - dep jazǵan Ashat Orazbaı.
Qazaqstannyń Irandaǵy elshisi sondaı-aq eki el arasyndaǵy saýda-ekonomıkalyq yntymaqtastyqtyń keńeıýine toqtalǵan.
Sondaı-aq, ırandyq BAQ-ta «Qazaqstannyń Tehrandaǵy elshisi Biz Iranmen ekonomıkalyq yntymaqtastyqty keńeıtýge múddelimiz», degen taqyryptaǵy maqala jaryq kórdi.
«Syrtqy saıasatta Irannan bólek Ózbekstan, Tájikstan, Qyrǵyzstan, Ázirbaıjan, Túrkimenstan sııaqty aımaq elderimen jaqsy qarym-qatynasta bolýǵa tyrysamyz»,- dedi Qazaqstannyń Tehrandaǵy elshisi.
Parstoday aqparat agenttiginiń habarlaýynsha, Ashat Orazbaı aldaǵy saılaýdan keıin jáne óziniń birqatar qoǵamdyq belsendilerimen jańa saıası reformalar baǵdarlamasy bastalǵannan keıin Qazaqstannyń «Shahıd Radjaı» Bandar Abbas portynyń qýatyn paıdalanýdy oılastyryp jatqanyna nazar aýdardy. Ol sonymen birge Qazaqstannyń jeke sektory óziniń ókildigin ashýǵa kirisip ketkenin, ekonomıkalyq sharalar arqyly Iranmen yntymaqtastyq keńeıip, eki el arasyndaǵy turaqty ekonomıkalyq qarym-qatynastar damıtynyna úmittenemiz dep málimdegen.
Antalııaǵa týrıst jiberetin elderdiń kóshin Reseı bastap tur - TRT
Antalııaǵa 1 qańtar men 15 qarasha aralyǵynda áýe joldary arqyly kelgen týrıst sany ótken jyldyń uqsas kezeńimen salystyrǵanda 48 paıyz artty. Antalııaǵa eń kóp týrıst jibergen elder arasynda 2 mıllıon 826 myń adammen Reseı alǵashqy oryndy ıeledi, dep habarlaıdy Túrkııa Radıo Televızııa portaly.
Atalǵan BAQ-tyń dereginshe, 1 qańtar men 15 qarasha aralyǵynda áýe joldary arqyly kelgen týrıst sany 13 mıllıon 3 myń 263 kisige jetken Antalııada nemis jáne aǵylshyn týrıst sany boıynsha barlyq ýaqyttarda rekord jańalanǵan.
«TRT»-nyń dereginshe, 1 qańtar men 15 qarasha aralyǵynda Antalııaǵa áýe joldary arqyly 13 mıllıon 3 myń 263 týrıst kelgen. Ótken jyldyń uqsas kezeńinde qalaǵa 8 mıllıon 812 myń 981 týrıst kelse, bıyl bul mólsher 48 paıyz artqan.
«Túrli elden kelgen qonaqtardyń demalý úshin tańdaıtyn mekenderiniń biri Antalııaǵa eń kóp týrıst jibergen elder arasynda 2 mıllıon 826 myń adammen Reseı alǵashqy oryndy ıeledi.
2 mıllıon 670 myń adammen Germanııa ekinshi, 1 mıllıon 88 myń adammen Ulybrıtanııa úshinshi, 744 myń 78 adammen Polsha tórtinshi jáne 434 myń 224 týrıstpen Gollandııa besinshi oryndy aldy», dep jazady túrkııalyq basylym.
Mońǵolııalyq teatr «Búrkit» dramasy kórermenge jol tartty - Kaznews
Baıan-Ólgıı aımaǵynyń M.Qurmanhan atyndaǵy mýzykaly drama teatrynyń 66- qysqy maýsymynyń ashylýyna oraı Mońǵolııa ónerine eńbek sińirgen qaıratker Aqtan Babıulynyń «Búrkit» týyndysy jelisimen jazylǵan Mońǵolııa mádenıetine eńbek sińirgen qaıratker Shynaı Rahmetulynyń «Búrkit» dramasyn 18-19 qarasha kúnderi ótedi, dep jazdy Kaznews.
Aıta keteıik, Mońǵolııadaǵy qazaq jazba ádebıettiń negizin salýshy – Aqtan Babıuly (1897-1973) tvorchestvosynyń kesek salasynyń biri onyń poemalary. Ol «Búrkit» (1959 j.), «Dosymbek-Balqııa»(1964 j.), «Ómir joly» (1972 j.) qatarly poemalarynda Mońǵolııa qazaqtarynyń revolıýtsııa qarsańyndaǵy áleýmettik turmysyn tereń ashyp kórsetedi. «Búrkit» poemasy aqyn poezııasynyń eń shoqtyǵy bıik týyndysy bolyp tabylady. A. Babıuly Mońǵolııa qazaqtarynyń alǵashqy dramatýrg jazýshysy.
Qazaq malshylary otarǵa kóshti - «Halyq» gazeti
Qarasha aıy kelip, kún sýyta tústi. Shyńjańnyń Іle Qazaq avtonomııaly oblysy Tekes aýdanyndaǵy malshylar otarǵa kóshýge qamdana bastady. Malshylar qoraly qoılaryn aıdap kúzdeýden Bozadyr qystaýlyǵyna qonys aýdardy.
Bul týraly osy aptada Qytaıdyń «Halyq» gazeti aqparattyq portaly habarlaǵan bolatyn.
Qytaılyq basylymnyń keltirgen málimetine súıensek, Tekes aýdanyndaǵy Bozadyr qystaýlyǵy Tıanshan taýynyń baýraıynda ornalasqan. Bozadyrdyń tórt jaǵyn taý qorshap, baýyrynda arqyrap Kóksý ózeni aǵyp jatady. Jyl saıyn qys jaqyndaǵanda malshylar baıyrǵy kósh jolymen 100 shaqyrymǵa jýyq jol júrip, taý asyp, tas basyp maldaryn Bozadyrǵa jetkizedi.
Sondaı-aq osy aptada «Halyq» gazeti aqparattyq portalynda, «Shyńjańnyń Іle oblysyndaǵy Karajon jaılaýynyń qardan keıingi kórkem kórinisi» degen taqyryptaǵy aqparattyq fotoreportaj jaryq kórdi.
Atalǵan BAQ-tyń málimetinshe, Shyńjańnyń Іle oblysyndaǵy Qarajon jaılaýynda alǵashqy qardan keıin taýlar, ańǵarlar men shabyndyqtar kúmis kórpe jamyldy. Jaıylǵan qoraly qoı, úıirli jylqy men sıyr tabyndary, áýede qalyqtaǵan kezquıryq múlgigen qysqy jaıylymnyń sulý kelbetin tipti de kóriktendirip jibergen.
«Qarajon jaılaýy Tekes aýdanynda ornalasqan. Bul ólke búkilálemdik tabıǵı mura bolyp tabylady», dep jazady «Halyq» gazeti.
Sonymen qatar, atalǵan BAQ-ta «Gansýdyń Aqsaıyndaǵy úıirli túıeler» degen taqyryptaǵy taǵy bir fotoreportaj jarııalandy.
Basylymnyń dereginshe, bıylǵy jyldyń 12 qarashasynda Gansý ólkesiniń Aqsaı Qazaq avtonomııalyq aýdanynyń malshylary túıeleriniń aıdan aman, jyldan esen shyǵýy úshin jem-shóbi mol qystaýlaryna aıdap apardy. Der kezinde qystaýǵa jetken túıeler endi qystan kúıli shyǵatyn bolady.
