Búrkit Aıaǵan: El aldyndaǵy qazirgi másele – álemdik trendterden qalmaý

NUR-SULTAN. QazAqparat – Jas memleketimizdiń aldynda turǵan qazirgi másele – álemdik trendterden qalmaý. Tarıh ǵylymdarynyń doktory Búrkit Aıaǵan Prezıdenttiń Qazaqstan halqyna arnaǵan Joldaýyn talqylaý barysyndaı osyndaı pikir bildirdi.

«Men birneshe óńirde bolyp, jurtpen tildestim. Sol kezde eldi «Endigi damý baǵytymyz qandaı bolady» degen saýal alańdatatynyn baıqadyq. Joldaýdyń mańyzdylyǵy osynda boldy dep oılaımyn. Prezıdent Qazaqstannyń egemendi, zaıyrly memleket ekenin basa aıtyp ketti. Damý joldaryna kelgende, Elbasy salǵan baǵyt jalǵasatynyn atady. Qazir halyqty qatty alańdatyp júrgen jaıt – shıkizattyń shetke ketýi. Bul el ishindegi eń bir ózekti dep aıtar edim. Prezıdent osy máselege mańyz berip qarady», - degen sarapshy Qazaqstannyń qaı elderdiń damý jolyna túsý kerektigi týraly pikirin aıtty.

«Shaǵyn jáne mıkrobıznesti qoldaý, agrarlyq sektor mena aýylǵa kóp kóńil bólý týraly da aıtyldy. Qazaqstannyń aldynda toqsanynshy jyldary qoıylǵan máseleler qazir sonshalyq mańyzdy emes. Jas memlekettiń aldynda turǵan qazirgi másele – álemdik trendterden qalmaý. Frantsııa, Germanııa, AQSh sııaqty elderdiń jolymen júrý. Ony Elbasynyń ózi de Almatyda ótken konferentsııada aıtty. Qazirgi zamanda kóppartııaly júıe, BAQ bostandyǵy sııaqty máseleler mańyzdy. Qazir eldiń áleýmettik jaǵdaıy jaqsy. Al rýhanııatqa toqtalsaq, Qasym-Jomart Kemelulynyń ál-Farabı men Abaıdyń mereıtoıyn atap ótý týraly ustanymy, Ulytaýdaǵy sózi qazaqstandyqtardy biriktirip, bir jolǵa salýǵa qaýqarly», - dedi tarıhshy.