Býrkına-Faso prezıdenti IYU-nyń sammıtine qatysatyndyǵyn rastady
ASTANA. QazAqparat - Qazaqstannyń Mysyrdaǵy elshisi Arman Isaǵalıev Kaır qalasyna resmı saparmen kelgen Býrkına-Fasonyń Prezıdenti Roch Mark Krıstıan Kaboremen kezdesti, dep habarlaıdy QR Syrtqy ister mınıstrliginiń baspasóz qyzmeti.
Elshi Býrkına-Faso kóshbasshysyna Qazaqstannyń Prezıdenti Nursultan Nazarbaevtyń 2017 jylǵy 10-11 qyrkúıekte Astana qalasynda ótetin Islam yntymaqtastyǵy uıymynyń Ǵylym jáne tehnologııalar jónindegi birinshi Sammıtine shaqyrýyn tabystady. Elshi áleýmettik-ekonomıkalyq damý, ǵylymı-tehnıkalyq progress, modernızatsııalaý jáne kedeıshilikpen kúresý sııaqty ıslam áleminiń ózekti máselelerin birlesip sheshý joldaryn qarastyratyn forýmnyń jumysyna Býrkına-Fasonyń qatysýy óte mańyzdy ekenin atap ótti.
R.M. Kabore shaqyrýdy rızashylyqpen qabyl alyp, óz eliniń Astana Sammıtine joǵary deńgeıde qatysatynyn rastady. Ol Kazaqstandy Býrkına-Faso úshin jan-jaqty qatynastardy damytýdy jáne nyǵaıtýdy qajet etetin Ortalyq Azııadaǵy dostas ári mańyzdy memleket dep qabyldaıdy jáne onymen qarym-qatynastardy damytyp, nyǵaıtý qajet dep esepteıdi.
Prezıdent sonymen qatar Qazaqstanda uıymdastyrylatyn forýmnyń der kezinde qolǵa alynǵandyǵyn ári ózekti másele ekendigin atap ótti. Sonymen qatar ol Qazaqstannyń halyqaralyq arenada mańyzdy ról atqaratynyn, eldiń óńirlik jáne álemdik deńgeıdegi máselelerdi sheshý isine qomaqty úles qosyp kele jatqandyǵyn aıtty.
