Burqasyn, kóktaıǵaq — Qyzylorda oblysynda kólik qozǵalysy shekteldi

QYZYLORDA. KAZINFORM — Qyzylorda oblysynda aýa raıynyń kúrt qubylýyna baılanysty «Samara-Shymkent» avtomobıl jolynyń birqatar bóliginde kólik qozǵalysy shekteldi.

4 aqpanda elorda ýaqytymen Qyzylorda oblysy Aral aýdany aýmaǵynda aýa raıy kúrt nasharlap ketti. Jol boıynda burqasyn, kóktaıǵaq bolyp tur.

«Osyǵan baılanysty 4 aqpanda saǵat 20.20-de aýa raıynyń kúrt nasharlaýyna baılanysty respýblıkalyq mańyzy bar „Samara-Shymkent“ avtomobıl jolynyń 1240-1360 shaqyrym aralyǵyna júk jáne qoǵamdyq kólikterdiń qozǵalysyna ýaqytsha shekteý qoıyldy. Ol Aqtóbe oblysynyń shekarasynan Aral qalasyna deıingi aralyqty qamtıdy», — dep málim etti Qyzylorda oblystyq Tótenshe jaǵdaılar departamentinen.

Eske salsaq, budan buryn Qyzylorda oblysynda qar qursaýynda qalǵan jolaýshylar qutqaryldy.