Burqasyn, kóktaıǵaq: Beısenbige kún raıy boljamy

ASTANA. KAZINFORM – 18 qańtarda Qazaqstan aýmaǵynyń basym bóliginde keń aýqymdy antıtsıklonnyń áserinen jaýyn-shashynsyz kún raıy qalyptasady. Bul týraly «Qazgıdromet» RMK málim etti.

Eldiń tek batys, soltústik-batys, soltústik aýdandarynda atmosferalyq fronttardyń ótýimen aýa raıynyń qubylmaly sıpaty boljanady. Onymen jaýyn-shashyn (kóbinese qar), burqasyn, tuman, kóktaıǵaq, jeldiń kúsheıýi kútiledi.

Sınoptıkter 8 óńirde eskertý jarııalap otyr.

Atap aıtqanda, Batys Qazaqstan oblysynyń ońtústiginde, soltústigi men shyǵysynda tumandy bolady.

Túrkistan oblysynyń ońtústiginde, taýly jáne taý bókterli aýdandarynda – tuman, taý asýlarynda jaıaý burqasyn boljanady. Ońtústik-shyǵystan jel soǵady, oblystyń taý asýlarynda ekpini 15-20 m/s quraıdy.

Atyraý oblysynda kóktaıǵaq bolady. Óńirdiń basym aýmaǵynda tuman baıqalady.

Shymkent qalasynda túnde jáne tańerteń keı ýaqytta tuman kútiledi.

Túnde Mańǵystaý oblysynyń batysynda, soltústigi men shyǵysynda – kóktaıǵaq, batysynda, soltústigi men ortalyǵynda tuman boljanady.

Kúndiz Soltústik Qazaqstan oblysynyń batysynda jaıaý burqasyn soǵady. Ońtústikten jel soǵady, óńirdiń ońtústigi men batysynda ekpini 15-20 m/s quraıdy.

Túnde Qostanaı oblysynyń batysynda, soltústiginde, kúndiz oblystyń shyǵysy men soltústiginde – burqasyn, óńirdiń ońtústiginde tuman kútiledi. Jeldiń jyldamdyǵy 15-20 m/s quraıdy.

Almaty oblysynda Úlken jáne Kishi Almaty sý alabtarynda jaýyn-shashynnyń túsýine jáne qar jamylǵysynyń turaqsyz bolýyna baılanysty qar kóshkini júrýi múmkin.