«Burynǵydan kúshti, ash bolyp oralamyn»: Shavkat Rahmonov kútpegen málimdeme jasady

ASTANA. KAZINFORM – Qazaqstandyq aralas jekpe-jek sheberi Shavkat Rahmonov oktagonǵa shyqpaýyna ne sebep bolǵanyn aıtty.

Sportshy H jelisinde jarııalanǵan jazbasynda ekinshi ret ota jasatqanyn jáne oktagonǵa shyǵatyn ýaqyty taǵy da keıinge qaldyrylǵanyn málimdedi.

– Jaýyngerdiń joly eshqashan ońaı bolǵan emes. Ómir bizge jeńe almaıtyn qıyndyqtardy bermeıdi. Árbir armannyń óz quny bar, keıde bul densaýlyqqa baılanysty bolýy múmkin. Búgin shynymdy aıtsam, jaraqatyma baılanysty taǵy bir ota jasatýǵa týra keldi jáne tolyq qalpyna kelý úshin ýaqyt qajet. Sondyqtan meniń oktagonǵa oralýym keıinge qaldyryldy, - dedi Shavkat Rahmonov.

Bul ózi úshin aýyr jańalyq bolǵanyn atap ótti.

– Muny qabyldaý qıyn, biraq men árbir sheginý úlken jospardyń bir bóligi ekenine shyn júrekten senemin. Men burynǵydan da kúshtirek, aqyldyraq jáne ash bolyp oralamyn. Maqsatym burynǵydaı. UFC belbeýin Qazaqstanǵa ákelýim kerek. Qandaı jaǵdaı bolmasyn, menimen birge bolǵan jandarǵa raqmet, - dedi Rahmonov.

Aldyn ala málimet boıynsha, Rahmonovty qalpyna keltirý úshin kem degende 9 aı qajet.

Bir kún buryn jankúıerler onyń Almatydaǵy Naiza týrnırinde aıaǵyndaǵy jaraqatyna baılanysty baldaqpen júrgenin baıqaǵan.

2025 jyldyń mamyrynda sportshyǵa operatsııa jasalǵan bolatyn.

Buǵan deıin Naiza lıgr prezıdenti Nurbek Qarabala Kazinform tilshisimen áńgimelesý barysynda Rahmonovtyń mansabyndaǵy uzaq úzilistiń sebebin aıtqan bolatyn. Aıtýynsha, sportshyny áli de mazalaıtyn jaraqat bolýy múmkin.

Shavkat Rahmonov 2024 jyldyń jeltoqsanynan beri jekpe-jek ótkizgen joq.